Եվրամիության արտաքին գործերի նախարարները քննարկել են Ուկրաինայում ռազմի դաշտում իրավիճակը, Ուկրաինայի էներգետիկ դիմակայունության ամրապնդումը և Ռուսաստանի դեմ նոր պատժամիջոցները։ Այս մասին ԵՄ արտաքին գործերի խորհրդի նիստից հետո հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը։ Նրա խոսքով՝ նախարարները Ուկրաինայի ԱԳ նախարար Անդրիյ Սիբիհայի հետ քննարկել են ռազմի դաշտում իրավիճակը և Ուկրաինայի էներգետիկ դիմակայունության ամրապնդումը։ Կալասը նշել է, որ հաջորդ ձմռանը Ռուսաստանը, ամենայն հավանականությամբ, կրկին կհարվածի Ուկրաինայի էլեկտրացանցին, ուստի ԵՄ-ն նախապատրաստվում է դրան։ «Ուկրաինային անհրաժեշտ են գեներատորներ, պահեստամասեր և վերանորոգման ֆինանսավորում»,- ասել է Կալասը։ Նա ընդգծել է, որ Ուկրաինայի հակաօդային պաշտպանությունը ևս շարունակում է առաջնահերթություն մնալ, և կոչ է արել այն անդամ երկրներին, որոնք ունեն համապատասխան պաշարներ, դրանք տրամադրել Ուկրաինային։ Կալասի խոսքով՝ ԱՄՆ-ի որոշումը՝ Կիևին թույլ տալ արտադրել Patriot հրթիռներ լիցենզիայի ներքո, դրական քայլ է, թեև դա ժամանակ է պահանջելու։ ԵՄ բարձր ներկայացուցիչը հայտարարել է, որ այսօր արդեն իններորդ անգամ անընդմեջ Արտաքին գործերի խորհուրդը Ռուսաստանի դեմ նոր պատժամիջոցներ է սահմանել։ «Մենք Ռուսաստանի դեմ պատժամիջոցներ ենք սահմանում աննախադեպ արագությամբ և մասշտաբով»,- ասել է Կալասը։ Նրա խոսքով՝ այսօրվա միջոցառումները և առաջիկա 21-րդ պատժամիջոցների փաթեթը միասին ներառում են ավելի քան 250 կետ։ Կալասը դա որակել է որպես 2022 թվականին Ռուսաստանի ներխուժումից ի վեր անհատական պատժամիջոցների ամենամեծ փուլը։ ԵՄ բարձր ներկայացուցիչը նշել է, որ հիմնական թիրախը Ռուսաստանի ռազմական մեքենայի ֆինանսական հենարանն է։