Բայդենն Իսրայելին հորդորել է երաշխավորել Ռաֆահում գտնվող քաղաքացիական անձանց անվտանգությունը

Բայդենն Իսրայելին հորդորել է երաշխավորել Ռաֆահում գտնվող քաղաքացիական անձանց անվտանգությունը

ԱՄՆ նախագահ Ջո Բայդենը հայտարարել է, որ Իսրայելի ռազմական գործողությունը Գազայի հատվածի Ռաֆահ քաղաքում չպետք է շարունակվի՝ առանց այնտեղ ապաստանած ավելի քան մեկ միլիոն մարդու անվտանգությունը երաշխավորելու։ Այս մասին Բայդենը հայտնել է Հորդանանի թագավոր Աբդալլահ 2-րդի հետ Վաշինգտոնում կայացած հանդիպմանը։ «Նրանց (Իսրայելի) խոշոր ռազմական գործողությունը չպետք է շարունակվի՝ առանց վստահելի ծրագրի՝ երաշխավորելու այնտեղ ապաստան գրած ավելի քան մեկ միլիոն մարդու անվտանգությունը և նրանց աջակցությունը։ Շատերը մի քանի անգամ տեղահանվել են՝ փախչելով հյուսիսում տեղի ունեցած բռնություններից», - Բայդենի խոսքերն է մեջբերում Սպիտակ տան մամուլի ծառայությունը։ Գազայի հատվածի 2,3 միլիոն բնակչության կեսից ավելին այժմ Եգիպտոսի հետ սահմանին գտնվող Ռաֆահ քաղաքում է, որտեղ մինչև Իսրայելի և պաղեստինյան ՀԱՄԱՍ արմատական շարժման միջև պատերազմն ապրում էր ընդամենը 250 000 մարդ։ Բայդենը շեշտել է, որ այդ մարդկանց հարկավոր է պաշտպանել։ «Մենք դեմ ենք Գազայից պաղեստինցիների ցանկացած բռնի տեղահանման», - ասել է Բայդենը։ Օրեր առաջ Իսրայելի վարչապետ Բենիամին Նեթանյահուն հայտարարել էր, որ զորքերին հրահանգել է պատրաստվել ցամաքային գործողությունը դեպի Ռաֆահ ընդլայնելուն՝ պնդելով, որ քաղաքում ՀԱՄԱՍ-ի զինյալներ են թաքնվում։ Ռաֆահը վերջին օրերին ենթարկվել է իսրայելական ավիահարվածների, որոնց հետևանքով կան զոհեր։ Հոկտեմբերի 7-ին ՀԱՄԱՍ-ի զինյալների ներխուժումից հետո Իսրայելում 1200 մարդ էր զոհվել, 250-ը՝ գերեվարվել։ Իսրայելը ՀԱՄԱՍ-ին ոչնչացնելու նպատակով ռազմական գործողություններ է սկսել Գազայի հատվածում, որտեղ զոհերի թիվն, ըստ պաղեստինյան իշխանությունների, հասել է 28 340-ի, 68 000 մարդ վիրավորվել է։