Լուսինե Ավանեսյանը մեկնաբանել է Արցախի Արտաքին գործերի նախարարի պաշտոնում Վարդան Օսկանյանի և Արա Այվազյանի թեկնածության վերաբերյալ շրջանառվող լուրը

Լուսինե Ավանեսյանը մեկնաբանել է Արցախի Արտաքին գործերի նախարարի պաշտոնում Վարդան Օսկանյանի և Արա Այվազյանի թեկնածության վերաբերյալ շրջանառվող լուրը

Արցախի Հանրապետության նախագահի մամուլի խոսնակ Լուսինե Ավանեսյանը մեկնաբանություն է տվել մամուլում շրջանառվող այն լուրերի վերաբերյալ, թե Արցախում Արտաքին գործերի նախարարի պաշտոնում քննարկումներ են ընթանում Վարդան Օսկանյանի և Արա Այվազյանի թեկնածությունների շուրջ։ «Հրապարակ» օրաթերթի հարցադրմանն ի պատասխան Լուսինե Ավանեսյանը նշել է, որ Արցախի Հանրապետության նախագահը Արտաքին գործերի նախարարի պաշտոնում նշանակում դեռևս չի կատարել, և Դավիթ Բաբայանը շարունակում է կատարել ԱԳ նախարարի լիազորությունները՝ որպես ժամանակավոր պաշտոնակատար։ «Ամենայն հարգանքով վերաբերվելով պարոնայք Վարդան Օսկանյանի և Արա Այվազյանի դիվանագիտական փորձին` նշեմ, որ Արցախի Հանրապետության արտաքին գործերի գերատեսչությունը ղեկավարելու առաջարկ Արցախի Հանրապետության Նախագահը նրանց չի արել և նման հարց այս պահին օրակարգում չկա։ Երբ հստակ որոշում կայացվի, ինչպես ԱԳ, այնպես էլ մյուս նախարարների նշանակումների վերաբերյալ հրամանագրերը կհրապարակվեն»,-ասել է Արցախի Հանրապետության նախագահի մամուլի խոսնակը: Ավելի վաղ «Հրապարակ» օրաթերթը գրել էր, որ Արցախում Արտաքին գործերի նախարարի պաշտոնում քննարկվում է Վարդան Օսկանյանի եւ Արա Այվազյանի թեկնածությունները։