Ուկրաինան հուսով է, որ 2022 թվականին Մադրիդում կայանալիք գագաթնաժողովում կհայտնեն ՆԱՏՕ-ին երկրի անդամակցության կոնկրետ ժամկետները: Ինչպես տեղեկացնում է «Ինտերֆաքս»-ը, այս մասին հայտարարել է Ուկրաինայի նախագահի գրասենյակի ղեկավար Անդրեյ Երմակը: «Կարծում եմ, որ ժամանակն է ունենալ շատ ազնիվ, շատ լիարժեք, շատ թափանցիկ զրույց Ուկրաինայի հետ ՆԱՏՕ - ում մեր հեռանկարի մասին», - ասել է Երմակը: Նա կարծում է, որ պատերազմի ժամանակ, ՆԱՏՕ-ի մասին զրույցի ողջ պատմության ընթացքում Ուկրաինան ցուցադրեց իր սկզբունքներով, դիրքորոշումներով, որ բացարձակապես պատրաստ է, կարող է ՆԱՏՕ-ի անդամ լինել: «Դա նշանակում է, որ այս տարի մադրիդյան գագաթնաժողովում հույս ունենք տեսնել և լսել բացարձակապես կոնկրետ ժամկետներ, այդ մասին բացարձակապես կոնկրետ տեղեկատվություն», - ասել է նա: Երմակն ընդգծել է, որ այժմ դա իր երկրի կյանքի ու մահվան հարցերն են: ՆԱՏՕ-ի գագաթնաժողովը Մադրիդում տեղի կունենա 2022 թվականի հունիսի 29-30-ը: