Հանրապետականները Թրամփին իմպիչմենթ հայտարարելու համար Սենատի նիստ չեն գումարի՝ նախքան Բայդենի երդմնակալությունը. WP
00:45 | 2021-01-14
ԱՄՆ Սենատում հանրապետական մեծամասնության առաջնորդ Միթչ Մաքքոնելը հրաժարվել է գործող նախագահ Դոնալդ Թրամփի դեմ իմպիչմենթի գործով լսումների համար նիստ գումարել Կոնգրեսի վերին պալատում, հաղորդում է The Washington Post-ը՝ իրազեկ աղբյուրին հղումով:
Աղբյուրի փոխանցմամբ, Մաքքոնելի օգնականները դեմոկրատական փոքրամասնության առաջնորդ Չակ Շումերի աշխատակազմին հաղորդել են, որ հանրապետականները չեն համաձայնի քննարկել իմպիչմենթի հարցը ուրբաթ, հունվարի 15-ին:
Միևնույն ժամանակ, ըստ Մաքքոնելի հանրապետական սենատորներին ուղղված գրության, սենատը հիմնական գործերի համար նիստ չի գումարի մինչև երեքշաբթի օրը ներառյալ, նշում է պարբերականը: Այսպիսով, սենատում իմպիչմենթի քննարկման ամենամոտ ժամկետը կարող է լինել հունվարի 20-ը՝ նորընտիր նախագահ Ջո Բայդենի երդմնակալության օրը: