Բունդեսթագի պատգամավոր Շտեֆեն Կոյտերը ընդգծել է, որ Արցախում նոր ցեղասպանություն է հասունանում` թուրք-ադրբեջանական զինված ուժերը փորձում են բնաջնջել Արցախի բնակչությանը: Կոյտերն այս մասին ասել է Արցախում տեղի ունեցած ասուլիսի ժամանակ: «Լեռնային Ղարաբաղի շուրջ ստեղծված իրավիճակը  լոկալ համարտություն չէ, այլ մեծ պատերազմ: Մենք փորձում ենք որևէ լուծում գտնել Արցախի համար: Բազմաթիվ մարդիկ դեռ պետք է հասկանան, թե ինչ է կատարվում: Մենք մեր աչքերով տեսել ենք, թե ինչպես են հրթիռակոծվել շենքերը և միջազգային մարդասիրական իրավունքով արգելված զենքեր են կիրառվել»,- ասել է Կոյտերը: Նրա խոսքով` միջազգային հանրությունը պետք է գիտակցի, թե ինչ է իրականում կատարվում Լեռնային Ղարաբաղում և դրա դեմ սկսի քայլեր ձեռնարկել: «Դատապարտում ենք այս ռազմական ագրեսիան և այն պետք է անհապաղ դադարեցվի: Այս առումով գտնում ենք, որ Ադրբեջանի և Թուրքիայի նկատմամբ պետք է պատժամիջոցներ կիրառվեն»,- եզրափակել է Շտեֆեն Կոյտերը: