Ռուսաստանում որոշել են միջուկային զենք կիրառելու պայմանները
00:50 | 2020-06-03
Ռուսաստանի Դաշնության նախագահ Վլադիմիր Պուտինը հրամանագիր է ստորագրել միջուկային զսպման ոլորտում պետական քաղաքականության հիմունքների վերաբերյալ, որը սահմանում է միջուկային զենքի կիրառման պայմանները:
Փաստաթղթի համաձայն, Ռուսաստանը միջուկային զենքը դիտարկում է միայն որպես զսպող գործոն և ջանքեր է գործադրում միջուկային սպառնալիքի նվազեցման համար:
Միջուկային զենքի օգտագործումը Ռուսաստանի համար խիստ ծայրահեղ միջոց է: Այնուամենայնիվ, Մոսկվան որոշ դեպքերում նման իրավունք իրեն վերապահում է: Առաջինը, եթե հավաստի տեղեկություններ են ստացվում Ռուսաստանի կամ նրա դաշնակից երկրների ուղղությամբ բալիստիկ հրթիռների գործարկման մասին:
Երկրորդ, եթե թշնամին միջուկային կամ զանգվածային ոչնչացման այլ զենք է օգտագործել Ռուսաստանի կամ նրա դաշնակիցների դեմ: Երրորդ, եթե թշնամին թիրախավորել է Ռուսաստանի համար գերկարևոր պետական կամ ռազմական օբյեկտները, որոնց շարքից դուրս բերումը կհանգեցնի միջուկային ուժերի պատասխան գործողությունների խափանմանը:
Բացի այդ, Մոսկվան կարող է միջուկային զենք օգտագործել, եթե հակառակորդն այնպիսի գործողություններ ձեռնարկի, որոնք վտանգում են պետության գոյությունը:
Հրամանագրում նշվում է, որ միջուկային զենքի բնագավառում պետական քաղաքականությունը պաշտպանական բնույթ է կրում, բայց կարող է փոխվել՝ կախված արտաքին և ներքին գործոններից: