Ֆուտբոլի Բելառուսի առաջնությունը վերջին օրերի մարզական միակ իրադարձությունն է, որը հայտնվել է միլիոնավոր մարդկանց ուշադրության կենտրոնում։ Աշխարհում օր օրի թափ հավաքող պանդեմիայի հետևանքով մարզական գրեթե բոլոր մրցաշարերը հետաձգված են, իսկ Բելառուսում... Այս երկրի նախագահ Ալեքսանդր Լուկաշենկոն հայտարարել էր, որ կորոնավիրուսը չի կարող իրենց շեղել կյանքի բնականոն ընթացքից։ Ավելին, Լուկաշենկոն կտրականապես դեմ է արտահայտվել վարակի տարածումը կանխելու համար տանը մնալու մեթոդիկային: «Մարդկանց տոթ բնակարաններում փակելը վիրուսի դեմ պայքարին չի օգնի։ Դա միանշանակ է։ Շնչառական հիվանդությունների դեպքում անհրաժեշտ է դուրս գալ և մաքուր օդ շնչել: Անհրաժեշտ է վարակի դեմ թիրախային պայքար մղել, ոչ թե զանգվածաբար բոլորին մեկուսացնել»,- հայտարարել է Բելառուսի նախագահը: Վերջինս ավելի վաղ համոզմունք էր հայտնել, որ կորոնավիրուսը հնարավոր է հաղթահարել տրակտոր քշելով, օղի խմելով և շոգեբաղնիք այցելելով: Լուկաշենկոյի նման մոտեցումը, բնականաբար, տարակուսանքի լայն ալիք է բարձրացրել աշխարհում։ Ոմանք այս մոտեցումը ծափահարում են, ոմանք էլ այն համարում խիստ վտանգավոր հիմարություն։ Ինչևէ, փաստն այն է, որ Բելառուսի առաջնությունը ակամայից դարձել է աշխարհի թիվ մեկ մրցաշարը։ Սոցիալական ցանցերում ֆուտբոլի հազարավոր երկրպագուներ ձևավորել են ֆան ակումբներ։ Եվրոպայում այսօր բազմահազարանոց երկրպագուների բանակ ունեն նույնիսկ բելառուսական այնպիսի ակումբներ, ինչպիսիք են, օրինակ, «Սլուցկը» կամ «Իսլոչը»։ Այս թիմերը Բելառուսի առաջնությունում երբեք աչքի չեն ընկել։ Նրանց մասնակցությամբ հանդիպումներին մարզադաշտ հաճախող մարդկանց կարելի է մատների վրա հաշվել։ Լուկաշենկոյի թեթև ձեռքով նույն «Իսլոչը» աշխարհի մասշտաբով ճանաչում է ձեռք բերել։ Ֆուտբոլի Բելառուսի առաջնությունը համախմբել է միլիոնավոր մարդկանց նաև այլ հարթությունում։ Մասնավորապես, խաղադրույքի սիրահարների կողմից միլիոնավոր դոլարների հոսք է սկսվել Բելառուսի առաջնության հանդիպումների վրա։ Ոմանք նույնիսկ կատակում են, որ մեկ պայմանավորված հանդիպումը կարող է ֆինանսական առումով զարկ տալ Բելառուսի տնտեսությանը։ Կարծում ենք՝ ակնհայտ է, որ Բելառուսի նախագահը, անտեսելով պանդեմիայի վտանգը, փորձում է իր պետությունը ներկայացնել որպես այլընտրանքային կղզյակ։ Առայժմ նման մարտավարությունը կարծես թե տալիս է իր էֆեկտը։ Մարդիկ խոսում են, որ Բելառուսի առաջնությունը դարձել է աշխարհի առաջնություն, բայց... Թե ինչի կհանգեցնի վտանգավոր այս խաղը՝ դժվար է ասել։ Պաշտոնական աղբյուրների համաձայն՝ Բելառուսում վարակի 163 դեպք է գրանցվել, մեկ մարդ էլ մահացել է: Հիմք ընդունելով պանդեմիայի համաշխարհային վիճակագրական տվյալները՝ կա մտավախություն, որ Բելառուսում կարող է աղետալի իրավիճակ ստեղծվել։ Վիրուսի առկայության պայմաններում տեղի են ունենում զանգվածային տարատեսակ միջոցառումներ, ինչը հղի է անդառնալի հետևանքներով։ Հիշեցնենք, որ եվրոպական երկրներում կորոնավիրուսի թափ հավաքելուն պես ՈՒԵՖԱ-ն ամռանը նախատեսված Եվրո-2020-ը հետաձգեց մեկ տարով։ «Մենք ղեկավարում ենք այն մարզաձևը, որով շնչում և ապրում են մեծ թվով մարդիկ, և որը հարձակման է ենթարկվել անտեսանելի հակառակորդի կողմից։ Նման իրավիճակում ամբողջ ֆուտբոլային աշխարհը պետք է միավորվի։ Երկրպագուների, ֆուտբոլիստների և մնացած աշխատակիցների առողջությունն առաջնահերթ է մեզ համար։ ՈՒԵՖԱ-ն ակումբային մրցաշարերն ավարտելու մի քանի տարբերակ է առաջարկել։ Հպարտ եմ, թե ինչպես արձագանքեցին իմ եվրոպացի գործընկերները։ Եվրոպայի առաջնության հետաձգումը մեծ վնաս կհասցնի ՈՒԵՖԱ-ին, բայց մենք ամեն ինչ կանենք, որպեսզի մեր գործընկեր երկրների ֆեդերացիաները չտուժեն։ Նպատակը կարևոր է շահույթից։ Նման որոշում ենք ընդունել հանուն եվրոպական ֆուտբոլի»,- հայտարարել էր ՈՒԵՖԱ-ի նախագահ Ալեքսանդր Չեֆերինը։ Եվրոպայի առաջնության եզրափակիչ մրցաշարն առաջին անգամ կկայանա 12 քաղաքներում՝ Լոնդոնում, Մյունխենում, Հռոմում, Կոպենհագենում, Բուխարեստում, Ամստերդամում, Դուբլինում, Բիլբաոյում, Բուդապեշտում, Սանկտ Պետերբուրգում, Գլազգոյում և Բաքվում: Ավելի վաղ կորոնավիրուսի կանխարգելման նպատակով դադարեցվել էին Չեմպիոնների լիգան ու Եվրոպայի լիգան, Եվրոպայի 5 առաջատար առաջնությունները (Անգլիա, Իսպանիա, Գերմանիա, Իտալիա, Ֆրանսիա) և մի շարք այլ լիգաներ, այդ թվում՝ Հայաստանի Բարձրագույն խումբը: Որոշում էր կայացվել մեկ տարով հետաձգել նաև Կոպա Ամերիկան։ Հետևողական քննարկումներից հետո հետաձգվեցին նաև ամռանը Տոկիոյում կայանալիք Օլիմպիական խաղերը։ Միջազգային օլիմպիական կոմիտեն և Ճապոնիայի իշխանությունները արդեն իսկ պայմանավորվել են խաղերի բացման ժամկետի շուրջ: Օլիմպիական խաղերի բացումը նախատեսված է 2021 թվականի հուլիսի 23-ին: