Ռուսաստանն ու ևս 7 երկիր կոչ են արել ՄԱԿ-ին չեղարկել COVID-19- ի դեմ պայքարին խոչընդոտող պատժամիջոցները
10:44 | 2020-03-26
Ռուսաստանը, Չինաստանը, Սիրիան, Իրանը, Հյուսիսային Կորեան, Վենեսուելան, Նիկարագուան և Կուբան ՄԱԿ-ի գլխավոր քարտուղար Անտոնիու Գուտերեշին խնդրել են պահանջել պետություններից վերացնել միակողմանի պատժամիջոցները, որոնք խոչընդոտում են կորոնավիրուսի դեմ պայքարին: Այդ մասին հայտնում է «Ինտերֆաքս»-ը:
«Մենք չենք կարող թույլ տալ, որպեսզի քաղաքական հաշիվները կանգնեն մարդկային կյանքեր փրկելու ճանապարհին: Գլոբալ համերաշխության ժամանակը եկել է», - նշվում է նամակում:
Հիշեցնենք, որ 2019 թվականի դեկտեմբերի 31-ին Չինաստանի իշխանությունները հայտարարեցին Ուհան քաղաքում թոքաբորբի բռնկման մասին: Հիվանդության հարուցիչը կորոնավիրուսի նոր տեսակ է, որին տրվեց COVID-19 պաշտոնական անվանումը: Մարտի 11-ին Առողջապահության համաշխարհային կազմակերպությունը (ԱՀԿ) այն որակեց որպես պանդեմիա: