Կողմերը դեռևս «հետախուզական» դիրքերում են կամ փաստաթղթի շուրջ համաձայնության չեն գալիս. ի՞նչ սպասել Մնացականյան-Մամեդյարով հանդիպումից

Կողմերը դեռևս «հետախուզական» դիրքերում են կամ փաստաթղթի շուրջ համաձայնության չեն գալիս. ի՞նչ սպասել Մնացականյան-Մամեդյարով հանդիպումից

Դեկտեմբերի 4-ին Բրատիսլավայում ԵԱՀԿ 26-րդ նախարարական խորհրդաժողովի շրջանակներում, ԵԱՀԿ Մինսկի խմբի համանախագահների միջնորդությամբ և մասնակցությամբ, կայանալու է Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը: Հանդիպմանն ընդառաջ ՀՀ ԱԳ նախարար Մնացականյանը հայտարարել է, որ հայկական կողմն աշխատելու է իր գերակայությունների ուղղությամբ։ «Մենք ունենք մեկ միասնական փաթեթ, որի մեջ շատ կան կարևոր հարցեր` բուն կարգավորմանն առնչվող, և կան շատ կարևոր հարցեր, որոնք վերաբերվում են միջավայրին, որի մեջ տեղի է ունենում խաղաղ կարգավորման գործընթացը: Բոլորը շատ կարևոր նշանակություն ունեն իրենց ամբողջության, իրենց համապարփակության մեջ: Բուն կարգավորման հարցում մեր գերակայություններն առնչվում են Լեռնային Ղարաբաղի անվտանգությանը և կարգավիճակին»,- հայտարարել է Մնացականյանը: Նախարարը հավասարաչափ կարևոր է համարում հարցերի մյուս շարքը, որոնք առնչվում են միջավայրին. «Ունեցանք որոշ համեստ արդյունք անցյալ ամսվա ընթացքում, և այդ ուղղությամբ աշխատել շարունակելը, իհարկե, մեզ համար կարևոր ու հետաքրքրական է: Հավասարաչափ կարևորություն եմ տալիս, ընդգծում եմ այն նշանակությունը, որը տալիս ենք բոլոր այն միջոցառումներին, որոնք ուղղված են էսկալացիայի ռիսկերի նվազեցմանը»։ Քաղաքագետ Գարիկ Քեռյանը, «Առաջին լրատվական»-ի հետ զրույցում խոսելով սպասվող հանդիպման ակնկալիքների մասին, նշեց. «Եթե մենք ուշադրություն դարձնենք Զոհրաբ Մնացականյանի՝ հանդիպումից առաջ արված հայտարարությանը, ապա կտեսնենք, որ նա ևս խուսափեց նշել, թե հանդիպման ժամանակ կոնկրետ որևէ փաստաթուղթ, սկզբունքներ քննարկելո՞ւ են, թե՞ ոչ։ Պարզապես նշեց, որ մենք փորձում ենք բանակցային գործընթացը դարձնել արդյունավետ և առավել օգտակար»։ Ըստ քաղաքագետի՝ սա հերթական հանդիպումն է, հանդիպումների, բանակցային պրոցեսի շղթան չկտրելու համար. «Իհարկե, սա շատ դրական է, բայց, այնուամենայնիվ, մենք պետք է նաև մի բան հասկանանք՝ կողմերը խուսափում են որևէ փաստաթղթի մասին խոսելուց, հակամարտության կարգավորման որևէ տարբերակ նշելուց։ Եթե մինչ այդ մենք մշտապես ականատես էինք լինում այն իրողությանը, որում շեշտադրվում էր Մադրիդյան սկզբունքների շուրջ բանակցությունները, ներկայումս այդ մասին էլ չի խոսվում։ Քանի որ բանակցային գործընթացը գաղտնի է, դժվար է ասել՝ արդյոք Մադրիդյան սկզբունքնե՞րն են նորից դրվելու սեղանին, թե՞ առայժմ բանակցություններ են հանուն բանակցությունների»։ Մեր զրուցակցի դիտարկմամբ՝ յուրաքանչյուր հանդիպում, անկախ այն բանից՝ կտա որևէ ռեալ արդյունք, թե ոչ, ինքնըստինքյան որոշակի նվաճում է. «Որովհետև այդ հանդիպումները նշանակում են, որ երկխոսությունը շարունակվում է, իսկ եթե երկխոսությունը շարունակվում է՝ նշանակում է, որ մենք կարող ենք երիտասարդ կյանքեր խնայել ռազմաճակատի գծում»։ Հարցին, այսինքն՝ սրանք պարզապես բանակցություններ են մինչև առարկայական բանակցություններ մթնոլորտի ձևավորման մասին, քաղաքագետը պատասխանեց. «Այո՛, որովհետև կա՛մ չենք կարողանում որոշակի փաստաթղթի շուրջ համաձայնության գալ, կա՛մ կողմերը դեռևս գտնվում են «հետախուզական» դիրքերում։ Չմոռանանք, որ Հայաստանում ձևավորվել է նոր իշխանություն, նոր քաղաքական էլիտա, և, բնականաբար, հին տրադիցիոն մոտեցումները՝ նախորդ 25 տարվա, 1998-ից հետո, հիմա չեն գործում։ Բացառված չէ, որ նման հանդիպումների գնալով՝ ադրբեջանական կողմը, այնուամենայնիվ, փորձում է շոշափել Հայաստանի նոր ղեկավարության, Հայաստանի դիվանագիտության նոր մանևրերի էությունը»։ Լուսանկարը՝ Armeniasputnik-ի