Մեր հասարակությունը հեղափոխությունից հետո յուրօրինակ կատարսիս ապրեց. Արմեն Էլբակյան
22:15 | 2019-12-02
Սունդուկյանի անվան ազգային ակադեմիական թատրոնում օրերս կայացավ Քեն Քիզիի «Թռիչք կկվի բնի վրայով» ստեղծագործության հիմնա վրա համանուն ներկայացման պրեմիերան. բեմադրության հեղինակը ՀՀ ժողովրդական արտիստ, ռեժիսոր Արմեն Էլբակյանն է:
«Առաջին լրատվական»-ի հետ զրույցում անդրադառնալով հարցին, թե ինչով էր պայմանավորված այս ստեղծագործության, այս թեմայի ընտրությունը, Արմեն Էլբակյանը նշեց. «Իմ ամբողջ կյանքում այս թեման ինձ հետապնդել է. դա անհատի ընդվզումն է հիվանդ հասարակության, տոտալիտար ռեժիմի, բռնության դեմ: Այս վեպը 20-րդ դարի լավագույն ստեղծագործություններից է, ժամանակը համընկավ, և առիթը եղավ այն բեմ բարձրացնելու համար»:
«Երբ սկսվում է քաոսը, ապա շատ կարևոր է սերն առ մերձավորը, արդարություն որոնելու ճանապարհը: Իսկ մեր ժամանակները ամբողջ աշխարհում մեծ քաոս են պարունակում, փոքր պատերազմները կարող են մի մեծ պատերազմի վերածվել, և այստեղ շատ կարևոր է մարդու դերը, նրա ապրելու կերպը և դրա մասին խոսելը: Իսկ այս վեպը առիթ է տալիս մտածելու՝ որն է ապրելու նպատակը, ինչպես պետք է ապրել այս աշխարհն ավելի լավը դարձնելու համար»,- ընդգծեց Ա. Էլբակյանը՝ հավելելով, որ շատ արդիական վեպ է և տալիս է շատ հարցերի պատասխան:
Արմեն Էլբակյանի դիտարկմամբ՝ այսօր՝ հեղափոխությունից հետո, արթնացում է տեղի ունենում մարդու գիտակցության մեջ. «Շատ-շատերը խավարի միջից դուրս գալու և վերագնահատելու հնարավորություն ունեցան՝ ինչպես են ապրել և ինչպես են ապրելու սրանից հետո... Սերմերը գցված են մեր հասարակության մեջ, մարդն ազատ կամքով է ստեղծված, և յուրաքանչյուրը հնարավորություն ունի վերափոխվելու, կատարսիս ապրելու, որը բերում է դեպի փրկություն: Մեր հասարակությունը ինչ-որ չափով յուրահատուկ կատարսիս ապրեց հեղափոխությունից հետո և շարունակում է ապրել: Մենք, որպես հասարակություն, պետք է գիտակցենք, որ այս աշխարհում միանգամից ոչինչ չի լինում, միանգամից միայն քանդվում է»:
Մանրամասն՝ տեսանյութում: