Կոտայքի մարզի ընդհանուր իրավասության դատարանը, հոկտեմբերի 8-ին քննվելով գեներալ Մանվել Գրիգորյանի կողմից խոշտանգված ազատամարտիկ Աշոտ Իսախանյանի պայմանական վաղաժամկետ ազատ արձակվելու վերաբերյալ բողոքը, մերժել է այն։ Աշոտ Իսախանյանը կշարունակի մնալ անազատության մեջ։ Այդ մասին «Առաջին լրատվական»-ի հետ զրույցում ասաց ինք՝ ազատամարտիկը։ Ավելի վաղ, հիշեցնենք, Քրեակատարողական վարչությունը դրական եզրակացություն է տվել «Սևան» ՔԿՀ-ի դատապարտյալի դիմումին, սակայն պրոբացիոն ծառայությունից այն մերժվել էր, ինչն էլ դատարանում դարձել էր բողոքարկման հիմք։ Նախկինում ազատամարտիկը 5 անգամ դիմել է պայմանական վաղաժամկետ ազատվելու համար, սակայն նրա բոլոր բողոքները մերժվել են։ Աշոտ Իսախանյանի պատժաչափին մնացել է 1 տարի 3 ամիս։ «Դատավոր Գոռ Շահբազյանը, դրսևորելով կամայական ձևով, մերժեց իմ պայմանական վաղաժամկետ ազատման հարցը՝ ենթարկվելով դատախազության թելադրանքին։ Նա շարունակում է իր նախկին կոլեգաների պատվերները կատարել։ Կարճ ասած՝ դատական համակարգում դեռևս տիրում է սերժիզմի ոճը»,- «Առաջին լրատվական»-ի հետ զրույցում ասաց ազատամարտիկը։ Նրա խոսքերով՝ մինչև դատական նիստի սկսելը դատավորը «ձեռ է առել իրեն», քմծիծաղով հակադարձել է իրեն՝ թե այլևս Արամ Խաչատրյանը չկա՞, որ քեզ դրական բնութագրի և այլն։ «Ես պատրաստվում եմ դիմել արդարադատության նախարարին, որպեսզի նա դիմի Բարձրագույն դատական խորհրդին Գոռ Շահբազյանին կարգապահական պատասխանատվության ենթարկելու համար, իր կամայականությունների և դատավորին ոչ վայել կեցվածքի, պահվածքի համար։ Ես ինքն էլ անձամբ դիմելու եմ ԲԴԽ-ին նույն հարցով»,- ասաց Իսախանյանը և, դիմելով վարչապետին, նշեց, որ ցանկանում է երկրի ղեկավարին իր օրինակով ցույց տալ, որ դատական համակարգից կոռուպցիան արմատախիլ չի եղել։ «Դատական համակարգը «ռակով հիվանդի կարգավիճակում է և չի բուժվում, իսկ դա նրանից է, որ համակարգում դեռ գործում են նախկին ռեժիմի դատավորները, ովքեր պետք է մաքրվեն արդարադատության համակարգից։ Այդ մարդիկ իրավունք չունեն դատավոր աշխատել։ Նախկինում էլ է Գոռ Շահբազյանը իմ դրական բնութագրի հիման վրա մերժել ինձ։ Երեկ էլ ուղղակի պատճառաբանեց, որ հավատ չեմ ներշնչում»,- ասաց ազատամարտիկը՝ հավելելով, որ չնայած իրեն 1 տարի 3 ամիս է մնացել, սակայն ինքը մինչև վերջ պայքարելու է, որ պայմանական վաղակետ ազատ արձակվի՝ իր օրինակով ցույց տալով, թե ինչ վիճակում է գտնվում ներկայիս դատական համակարգը։ Հիշեցնենք, որ Աշոտ Իսախանյանն այն ազատամարտիկն է, որին, իր պնդմամբ, գեներալ Մանվել Գրիգորյանը 2000 թվականին 22 օր շղթայված պահել է ու խոշտանգել գումարային խնդիրների պատճառով։ Իսախանյանը այս տարվա հունիս ամսին դիմել էր դատարան և տեղեկացրել, որ ինքը Մանվել Գրիգորյանի գործով հանդիսանում է տուժող, քանի որ Գրիգորյանն իրեն 22 օր պահել է «պադվալներում», խոշտանգել է ու սպառնացել: Դեռ հունիս ամսին Իսախանյանը «Առաջին լրատվական»-ի հետ զրույցում մանրամասներ էր պատմել իր հետ կատարվածից՝ նշելով. «Ծեծողներից մեկին շատ լավ հիշում եմ, իր աջ ձեռքն էր՝ Ճուտ մականունով։ Սկսեցին ծեծել, ապա մեշոկը քաշեցին գլխիս ու ինձ տարան պադվալ, ժնջիլները գցեցին վիզս ու այդպես 22 օր, օրը մի քանի անգամ գալիս ծեծում էին ինձ, խմած, հարբած գալիս ու ծեծում էին։ Մանվել Գրիգորյանն անձամբ ինքը աթոռի ոտները ջարդում էր ու ծեծում էր։ Նշեմ, որ այդ տեղում, որտեղ որ ինձ պահում էին, խոսակցություններ էին գնում, որ Մանվել Գրիգորյանն իր բանդայի հետ ազատամարտիկ էին կախել, որը հետո սարքել էին ինքնասպանություն։ Դրանից հետո Մանվելը որոշեց, որ ինձ պետք ա կրակի։ Վստահ եմ, որ կխփեր, բայց էդ պահին զանգ եկավ իրեն։ Հետո ինձ տենց ժնջիլով կապած տարան արջի վանդակը։ 3 օր նույն վանդակում համ արջն էր կապած, համ ես, կես մետր դիստանցիա էր ընդամենը»։ Այս գործով ազատամարտիկը տուժող է ճանաչվել։ Ներկայումս քննություն է գնում։