«Շատ կուզենայի, որ Արցախի ընտրություններում թեկնածուները վարեին ասպետական կեցվածք՝ առանց իրար մեղադրելու, առանց միմյանց մեջ թշնամիներ փնտրելու, և տեղի ունենային արդար և թափանցիկ ընտրություններ»,- այս մասին «Առաջին լրատվական»-ի հետ զրույցում ասաց «Հանրապետություն» կուսկացության առաջնորդ Արամ Սարգսյանը՝ հավելելով, որ կարևոր է, թե թեկնածուներից յուրաքանչյուրն ինչպես է պատկերացնում արցախյան խնդրի լուծումը, ինչպես է պատկերացնում միացման հասնելու մոտեցումները: Ա. Սարգսյանի խոսքով՝ Արցախում կա մի որոշակի թև, որն Արցախի կարգավիճակը տեսնում է Ռուսաստանի շրջանակներում: Նախկինում այդ գործընթացը ծավալում էր Զորի Բալայանը, այժմ այդ թեմաներով սկսել է խոսել Սամվել Բաբայանը: Այս առումով որոշակի տրամադրություններ կան, ինչը որոշակի հարցականներ է առաջացնում, բայց դրա հետ կապված վտանգ չեմ տեսնում: Հայաստանում աշխարհի բոլոր բևեռներն էլ որոշակի չափով պետք է ներկայացված լինեն. քաղաքականությունը սա է»: Անդրադառնալով Արցախի ԱԱԾ պետի հայտարարությանն այն մասին, որ «հաջողվեց չեզոքացնել երրորդ երկրի միջամտությունը», Արամ Սարգսյանն ընդգծեց, որ երրորդ երկիրը Ռուսաստանն է, որը մշտապես ուզում է իր ազդեցության շրջանակները մեծացնել և խորացնել, բայց Ստեփանակերտի հանրահավաքը ցույց տվեց, որ Արցախի ժողովրդի մեծամասնությունն այդ երրորդ երկրին ասաց՝ ոչ, «երկրի ճակատագիրը որոշողը ես եմ»: «Հանրապետություն» կուսակցության առաջնորդի դիտարկմամբ՝ Արցախի ըտնրություններին մասնակցող նոր մարդիկ չկան, որոնք ընդհանրապես նախկին իշխանությունների հետ որևէ կապ ունեցած չլինեն. «Արցախի՝ զինվորական առօրյայով ապրող երկրի համար շատ կարևոր է, որ կառավարող ուժի առաջնորդը զինվորական անցած ուղի ունենա, իմանա անցած-գնացած ճանապարհը»: Ա. Սարգսյանի դիտարկմամբ՝ սեփական շահը հետապնդող իշխանություններն օգտվեցին արցախյան ազատամարտում հերոսացած տղաների մարդկային թուլություններից, նրանց նվիրման ունակությունը վատի համար օգտագործեցին: «Հերոս լինելը երկիրը թալանելու իրավունք չի տալիս, բայց նրանց դատապարտելու ժամանակ պետք է մեղմացուցիչ հանգամանք կիրառել»,- նշեց Ա. Սարգսյանը՝ հավելելով, որ եթե մարդու վրա արյան մեղք կա, անկասկած պետք է դատապարտվի: Ա. Սարգսյանը նշեց նաև, որ մեղմացուցիչ հանգամանքի մոտեցման մասին խոսելով՝ նկատի չունի երկրորդ նախագահին, և որ երբեք նրան հերոսների շարքին չի դասել: «Ես համարում եմ, որ չկա որևէ մեկը, ով հայ քաղաքական իրականության մեջ երկրին այդ չափով և այդ որակի բարոյական, նյութական և մարդկային վնաս տված լինի… Մեր երկրի համար անգամ հայր և որդի Ալիևներն այնքան վատություն չեն արել, որքան Քոչարյանը»:   Մանրամասն՝ տեսանյութում: