ԲՀԿ նախագահ Գագիկ Ծառուկյանին հրավիրել են Աբովյանի քաղաքապետի ընտրության գործընթացում տեղի ունեցած հրկիզման գործով հարցաքննության՝ որպես վկա: Խոսքը «Քաղաքացիական պայմանագիր» կուսակցությունից քաղաքապետի թեկնածուի ենթաշտաբներից մեկի պետի մեքենան և տունը հրկիզելու գործի մասին է: Իհարկե, քննությունը պետք է պարզի, թե արդյոք դա անմիջապես կապ ունի՞ ընտրական գործընթացի հետ, որում, ինչպես հայտնի է, ինտրիգը ՔՊ թեկնածուի և Գագիկ Ծառուկյանի փաստացի աջակցությունը վայելող գործող քաղաքապետի պայքարն էր: Այն հանգուցալուծվեց հօգուտ Ծառուկյանի թեկնածուի, իսկ վարչապետ Փաշինյանը հայտարարեց, որ նաև դրա համար է հեղափոխություն եղել, որ ընտրություններում միշտ իշխող ուժի թեկնածու չհաղթի: Գագիկ Ծառուկյանը նախօրեին լրագրողների հետ զրույցում ասել էր, որ հրկիզման փորձը սադրանք էր: Ինչ խոսք, սա ամենատարածված բնութագրերից է այդպիսի դեպքերում: Մյուս կողմից՝ նաև կա տրամաբանական հարցադրում՝ ինչո՞ւ պետք է Ծառուկյանը կամ նրա թիմը գնար մրցակցի ենթաշտաբի պետի մեքենա և տուն այրելու, եթե կա մի շատ ուշագրավ հանգամանք՝ այրվել է փաստացի իշխող ուժի ներկայացուցչի տուն ու մեքենա, այն ուժի, որի ձեռքին են իրավապահ բոլոր լծակները, որպեսզի բացահայտվի հանցագործությունը: Հազիվ թե հնարավոր է մեքենայի և տան հրկիզման փորձը գնահատել դարի հանցագործություն, որն անհնար է բացահայտել: Իհարկե, միարժեք ասել, որ «ուչաստկովիի մակարդակի» գործ է, որևէ մեկը չի կարող, բայց ենթադրվում է, որ այդուհանդերձ այդպիսի հանցագործությունները իսկապես «ուչաստկովիի» մակարդակի են, և եթե իրավապահները չեն կարողանալու բացահայտել դրանք, ապա դա շատ վատ ազդակ է հանրությանն ու լավ ազդակ մարդկանց, որոնք ցանկանում են հին բարքերը վերադարձնել ընտրական և ընդհանրապես հասարակական-քաղաքական գործընթաց: Գործնականում Աբովյանի քաղաքապետի ընտրությունը հանրային-քաղաքական գործընթացի և ներքաղաքական իրավիճակի համար վտանգավոր է լինելու ոչ թե իր արդյունքով, որտեղ հաղթում է ոչ թե հեղափոխության թեկնածուն, այլ փաստացի նախկին համակարգը ներկայացնող ԲՀԿ դե ֆակտո աջակցությունը վայելող ուժը, այլ հենց հրկիզման դեպքով ու դրա չբացահայտվածությամբ: Ըստ այդմ՝ բացահայտումը և մեղավորների հայտնաբերումն ու պատիժը ստանում են շատ ավելի լայն նշանակություն, քան զուտ քրեական հանցագործությունը, որ ենթակա է բացահայտման: Հարցը ստանում է հասարակական հնչեղություն հանրային և քաղաքական կյանքի առողջացման տեսանկյունից, այդ թվում և այն հարցադրումների համատեքստում, որ վարչապետ Փաշինյանն արեց «սևազգեստ խմբերի» համատեքստում՝ հանձնարարելով ոստիկանությանն ու ԱԱԾ-ին բացահայտել դրանց և ճանապարհել բնականոն կյանք՝ թույլ չտալով, որ մարդկանց մեջ սերմանեն անպաշտպանության և քաոսի, ամենաթողության զգացում: Ի վերջո, Աբովյանի քաղաքապետի ընտրությունը կարող էր «հրկիզել» որևէ երրորդ կողմ: Բայց հարցն իհարկե հնարավոր վարկածները չեն, այլ դրանցից ճշմարտությունը զատելն ու հանրությանը ներկայացնելը՝ որպես նաև պաշտպանվածության երաշխիք իրավապահներից: Այդ իմաստով Աբովյանի հրկիզման գործը լակմուսի թուղթ կամ ինդիկատոր է: Լուսանկարը՝ Armeniasputnik-ի