Ֆրանսիացի բժիշկները պարզել են, որ սուրճի օգտագործումն օգնում է վերացնել մկանների աշխատանքի խանգարում առաջացնող հազվագյուտ գենետիկական խանգարումը: Նախնական տվյալներով, խմիչքի օգտակար հատկության մասին իմացել են 11-ամյա մի տղայի ծնողների շնորհիվ, որը ADCY5 գենի արատ ուներ, ինչը վերջույթների և դեմքի չվերահսկվող շարժումների պատճառ է հանդիսանում: Միևնույն ժամանակ, երեխայի ծնողները սուրճի բուժիչ հատկությունները պատահականորեն են հայտնաբերել. նրանք նկատել են, որ կոֆեին չպարունակող էսպրեսո գնելու դեպքում նրանց որդու մոտ նոպաներն ավելի հաճախակի են եղել: Իսկ երբ երեխային կրկին սկսել են կոֆեին տալ՝ նոպաները դադարել են: «Սա բժշկության պատմության հետ կապված անհավանական պատահականություններից մեկն է»,- Փարիզի Պիտյե-Սալպետրիեր հիվանդանոցի բժիշկ Էմանուել Ֆլաման-Ռոզի խոսքերը մեջբերում է MedicalXpress-ը: Նշվում է, որ բժիշկները վաղուց են ձևակերպել օգտակար հատկության հիպոթեզը, սակայն, քանի որ հազվագյուտ հիվանդությամբ տառապում է միլիոնից մեկը, հնարավորություն չի եղել փորձարկում անցկացնել: Բացի դրանից, բժիշկներին ետ է պահել հարցի բարոյական կողմը, քանի որ սուրճի հատկությունները փորձարկելու համար կամավորներից կեսին պետք է տրվեին բաղադրիչներ՝ պլացեբոյի ազդեցության պարզաբանման համար, ինչը կարող էր սուր ցավեր առաջացնել: