Բաքուն՝ Լեռնային Ղարաբաղից ռուսաստանյան խաղաղապահ զորախմբի հապճեպ դուրսբերման մասին
16:09 | 2024-04-17
Երկու երկրների ղեկավարները որոշում են կայացրել Ադրբեջանի տարածքից ռուս խաղաղապահների վաղաժամկետ դուրսբերման մասին։ Ինչպես հաղորդում են ադրբեջանական լրատվամիջոցները, համանման հայտարարությամբ հանդես է եկել Ադրբեջանի նախագահի օգնական Հիքմեթ Հաջիևը՝ մեկնաբանելով Լեռնային Ղարաբաղից ռուսաստանյան խաղաղապահ զորախմբի հապճեպ դուրսբերումը։
«Հիմք ընդունելով 2020 թվականի նոյեմբերի 10-ին ստորագրված եռակողմ հայտարարությունը՝ երկու երկրների բարձրագույն ղեկավարությունը որոշում է կայացրել Ադրբեջանի Հանրապետության տարածքում ժամանակավորապես տեղակայված Ռուսաստանի Դաշնության խաղաղապահներին մեր երկրի տարածքից վաղաժամկետ դուրսբերման մասին։ Գործընթացն արդեն սկսվել է, Ադրբեջանի և Ռուսաստանի պաշտպանության նախարարությունները ձեռնարկում են անհրաժեշտ միջոցներ այս որոշումը կյանքի կոչելու համար»,- ասել է Հաջիևը։
Ավելի վաղ Ռուսաստանի նախագահի մամուլի քարտուղար Դմիտրի Պեսկովը լրագրողներին հաստատել էր, որ սկսվել է ռուս խաղաղապահների դուրսբերումը Լեռնային Ղարաբաղից։