Երեկ մամուլում տեղեկություն տարածվեց, որ Մյունխենի «Բավարիայի» հայազգի հարձակվող Հրանտ-Լեոն Ռանոսը համալրելու է Հայաստանի ազգային հավաքականի շարքերը։ «Առաջին լրատվական»-ի տեղեկություններով Ռանոսը հրավիրվելու է մարտի 25-ին Երևանում կայանալիք Եվրոպայի առաջնության ընտրական փուլի Հայաստան-Թուրքիա հանդիպմանը։ 20-ամյա հարձակվողը ծնվել է Գերմանիայի Գերդեն քաղաքում և ունի հայկական արմատներ` կրելով նաև Երանոսյան ազգանունը։ Ռանոսը 2018 թվականից ելույթ է ունենում «Բավարիայում», որի տարբեր տարիքային թիմերի կազմում անցկացրել է 75 հանդիպում` դառնալով 34 գոլի և 22 գոլային փոխանցման հեղինակ։ Գերմանիայի ընթացիկ առաջնությունում Լեոն-Ռանոսը «Բավարիայի» երկրորդ թիմի լավագույն ռմբարկուն է։ «Հրանտը վերջին շրջանում էական աճ է գրանցել և հանդիսանում է մեր թիմի լավագույն ռմբարկուն։ Միևնույն ժամանակ Ռանոսը թիմին մեծ օգուտ է տալիս արդյունավետ փոխանցումներով։ Մենք մեծ հույսեր են կապում նրա հետ»,- ասել է «Բավարիա-2»-ի գլխավոր մարզիչը։ Հայազգի ֆուտբոլիստն այս մրցաշրջանում անցկացրել է 21 խաղ՝ խփելով 12 գոլ և կատարելով 7 գոլային փոխանցում։ Հայազգի ֆուտբոլիստը պարբերաբար մարզվում է նաև Մյունխենի «Բավարիայի» հիմնական թիմի հետ։ Հավանական է, որ մոտ ապագայում Ռանոսին տեսնենք գերմանական լեգենդար ակումբի հիմական թիմում։ Գերմանական մամուլը դեռևս անցյալ տարի գրում էր, որ Մյունխենյան գրանդի գլխավոր մարզիչ Յուլիան Նագելսմանը հայազգի ֆուտբոլիստի հետ մեծ հույսեր է կապում։ Նշենք, որ Ռանոսը խաղում է հարձակման կենտրոնում արդյունավետ գործելով նաև «երկրորդ հարում»։ Ըստ Տրանսֆերմարկետ պարբերականի Ռանոսի տրանսֆերային արժեքը կազմում է 325 հազար եվրո։ Ինչևէ, Հայաստանի ազգային հավաքականը 2022 թվականի աշխարհի առաջնության ընտրական փուլում, ինչպես նաև անցյալ տարի տեղի ունեցած Ազգերի լիգայի խաղարկությունում լուրջ խնդիրներ ունեցավ հատկապես հարձակման կենտրոնում։ «Բոկա Խունիորսի» ներկայացուցիչ Նորբերտո Բրիասկո-Բալեկյանը տարբեր պատճառներով հիմնական չէր միանում ազգային թիմին, իսկ Ալեքսանդր Կարապետյանի խաղային որակներն այլևս չեն համապատասխանում մեր գլխավոր թիմի խաղամակարդակին։ Հայաստանի հավաքականի նախկին գլխավոր մարզիչ Խոակին Կապառոսը կենտրոնական հարձակվողի բացը փորձում էր լրացնել տակտիկական տարբեր լուծումներով, բայց․․․։ Ժամանակը ցույց տվեց, որ առանց նոմինալ կենտրոնականի հնարավոր չէ լուրջ արդյունքրի հասնել։ 2022 թվականի աշխարհի առաջնության ընտրական փուլի մեկնարկային երեք հանդիպումներում Հայաստանի հավաքականը նույնքան հաղթանակ էր տարել, առավելության հասնելով Լիխտենշտեյնի, Իսլանդիայի և Ռումինիայի նկատմամբ։ Այդ մրցավեճերին մասնակցել էր նաև Բալեկյանը աչքի ընկնելով արդյունավետ գործողություններով։ Արգենտինայի առաջնության 4-րդ տուրի խաղում «Բոկա Խունիորսն» նախօրեին սեփական հարկի 3։1 առավելության էր հասել «Պլատենսեի» նկատմամբ։ 67-րդ րոպեին դուրս գալով փոխարինման, ընդամենը 7 րոպե անց դաշտի տերերի երրորդ գնդակը տպավորիչ հարվածով խփել էր Բալեկյանը։ Վերջինս առաջին հանդիպումն էր անցկացրել ընթացիկ առաջնությունում։ Անցյալ տարի այս ֆուտբոլիստը վնասվածքների պատճառով չկարողացավ կայուն խաղ ցուցադրել։ Եվրոպայի առաջնության ընտրական փուլին ընդառաջ կարծես դրական դեղարաշարժ է նկատվում կենտրոնական հարձակվողի բացը լրացնելու գործում։ Մասնավորապես, եթե առաջիկա հանդիպումներում մեր ազգային թիմի գլխավոր մարզիչ Ալեքսանդր Պետրակովի տրամադրության տակ լինին Բելեկյանն ու Ռանոսը տակտիկական առումով Հայաստանի հավաքականը անհամեմատ ավելի բարվոք վիճակում կհայտնվի։ Դառնալով գոլի հեղինակ Բալեկյանն ապացուցեց, որ կարող է օգնել Հայաստանի ազգային թիմին։ Շատերը կհամաձայնվեն, որ Եվրոպայի առաջնությանն ընտրական փուլին և մասնավորապես Թուրքիայի դեմ խաղին ընդառաջ անհրաժեշտ է մոբիլիզացնել ողջ ռեսուրսը։ Չմոռանանք, որ Հայաստանի հավաքականի առաջ խնդիր է դրված նվաճել Եվրոպայի առաջնության եզրափակիչ փուլի ուղեգիր։