«Հանրապետություն»-ը Ֆրանսիայից ակնկալում է Արցախի Հանրապետության ամբողջական ճանաչում

«Հանրապետություն»-ը Ֆրանսիայից ակնկալում է Արցախի Հանրապետության ամբողջական ճանաչում

«Հանրապետություն» կուսակցությունը Ֆրանսիայից ակնկալում է Արցախի Հանրապետության ամբողջական ճանաչում։ «Հանրապետություն» կուսակցությունը ողջունում է Ֆրանսիայի Սենատի՝ նոյեմբերի 25-ին ձայների մեծամասնությամբ ընդունված բանաձևը, որով ճանաչվում է Արցախի Հանրապետությունը: Խորհրդանշական է, որ Ֆրանսիան աշխարհում առաջինը ճանաչեց 1915թ-ի հայոց ցեղասպանությունը և առաջինը Սենատի մակարդակով ճանաչեց Արցախը՝ պահանջելով 1994թ-ի հրադադարով հաստատված սահմանների վերականգնում, արձանագրելով Ադրբեջանում հայերի ազատ և անվտանգ գոյության անհնարինությունը, պաշտպանելով հայ ժողովրդի մշակութային ու կրոնական ժառանգությունը: Շնորհակալություն հայտնելով Ֆրանսիայի նախագահ Էմանուել Մակրոնին՝ պատերազմի առաջին իսկ օրից գործադրած ջանքերի համար, և սենատորներին՝ հույս ունենք, որ դեկտեմբերին Ազգային ժողովը ևս կընդունի Արցախի Հանրապետությունը ճանաչող բանաձև, և ճանաչումը կամբողջացնի Ֆրանսիայի կառավարությունը: Հույս ունենք նաև, որ իբրև ԵԱՀԿ Մինսկի խմբի համանախագահ՝ Ֆրանսիան կդիմի մյուս համանախագահներին՝ հետևելու իր օրինակին՝ ապահովելու համար ԵԱՀԿ Մինսկի խմբի շրջանակներում Արցախի կարգավիճակի հարցի լուծումը՝ նվազագույնը ԼՂԻՄ-ի սահմաններում, և Լեռնային Ղարաբաղի հարցի վերջնական լուծումը՝ խաղաղության շրջանակային համաձայնագրի կնքումով՝ հանուն տարածաշրջանի խաղաղության ու բարեկեցության: