Երևանի «Նոան» ևս մեկ տիտղոս նվաճեց։ Երեկ ֆուտբոլի ակադեմիայում, կայացավ Հակոբ Տոնոյանի անվան Սուպերգավաթ 2020-ի հանդիպումը, որում մրցեցին Հայաստանի գործող գավաթակիրն ու չեմպիոնը՝ «Նոան» և «Արարատ-Արմենիան»: Խաղի հիմնական ժամանակում գրանցվեց ոչ-ոքի՝ 1։1։ Լրացուցիչ ժամանակում «Նոան», ևս մեկ գնդակ խփելով, հաղթեց 2:1 հաշվով։ Ի դեպ, մինչև 90-րդ րոպեն «Նոան» պարտվում էր, սակայն անկյունայինի խաղարկումից Լավրիշևի խփած գոլի շնորհիվ խաղը տեղափոխվեց լրացուցիչ ժամանակ: 99-րդ րոպեին «Նոայի» կազմում աչքի ընկավ նորեկ Դենիս Դեդեչկոն, որն իր առաջին պաշտոնական խաղն էր անցկացնում երևանյան թիմի կազմում։ Ի դեպ, մոտ մեկ ամիս առաջ, պատմության մեջ առաջին անգամ, Երևանի «Նոան» դարձել էր նաև Հայաստանի գավաթակիր։ Գերլարված և դրամատիկ խաղում «Նոայի» ֆուտբոլիստներն առավելության էին հասել նույն «Արարատ-Արմենիայի» նկատմամբ։ Այս հանդիպումը շատերը համարում են բոլոր ժամանակների ՀՀ գավաթի խաղարկության լավագույն եզրափակիչը։ Մասնավորապես, հենց հանդիպման սկզբից իրադարձությունները զարգացան ուղղակի անհավանական ընթացքով: «Արարատ-Արմենիան» առաջինն օգտվեց «Նոայի» պաշտպանների սխալից, և 9-րդ րոպեին Օգանան բացեց խաղի հաշիվը: Բաց թողած գնդակից հետո «Նոան» առավել շատ էր տիրում գնդակին: Հանդիպման 23-րդ րոպեին խաղային անսպասելի դրվագում «Նոայից» ինքնագոլի հեղինակ դարձավ Տատաևը: «Արարատ-Արմենիան» 27-րդ րոպեին կարողացավ նաև եռապատկել հաշվի տարբերությունը: Մրցակցի տուգանային հրապարակում առաջինը կողմնորոշվեց Օտուբանջոն: Երբ հաշիվը դարձավ 3։0, շատերը ժամանակից շուտ Հայաստանի գավաթակիր էին տեսնում «Արարատ-Արմենիային»։ Հաղթանակին ժամանակից շուտ հավատացին նաև «Արարատ-Արմենիայի» ֆուտբոլիստները։ Առաջին կեսի վերջնամասում «Նոայից» Մայրովիչը կարողացավ դիպուկ հարվածով կրճատել հաշվի տարբերությունը: Մինչ թիմերը կգնային հանգստի՝ «Արարատ-Արմենիա»-ից դուբլ ձևակերպեց Օգանան՝ հաշիվը դարձնելով 4։1: Երկրորդ կեսի մեկնարկում «Նոան» ստացավ 11 մետրանոց հարվածի իրավունք, որն անվրեպ իրացրեց Ազարովը: «Նոան» շարունակեց տիրել իրավիճակին և խփեց նաև երրորդ գնդակը: Դիպուկ հարվածով աչքի ընկավ Կովալենկոն: «Նոան» շարունակեց անհավանական խաղ ցուցադրել և կարողացավ վերականգնել հաշվի հավասարությունը: 4-րդ գնդակը խփեց Սպետառուն: Խաղի ավելացված րոպեներին կրքերը բորբոքվեցին, և մրցավարը խաղից հեռացրեց «Արարատ-Արմենիայից» Կոդջոնին: Հիմնական ժամանակն ավարտվեց ոչ-ոքի` 4:4, և խաղը տեղափոխվեց լրացուցիչ ժամանակ: «Արարատ-Արմենիան», կարմիր քարտից հետո, մնաց 9 ֆուտբոլիստով, քանի որ վնասվածքի պատճառով հանդիպումը շարունակեց Վակուլենկոն: Լրացուցիչ ժամանակի երկրորդ կեսում մրցավարը 11 մետրանոց նշանակեց «Արարատ-Արմենիայի» դարպասին, որն իրացրեց Ազարովը։ Րոպեներ անց էլ «Արարատ-Արմենիայից» Օտուբանջոն հաշիվը դարձրեց 5։5: Ի վերջո, խաղի ելքը որոշվեց հետխաղյա 11 մետրանոց հարվածների շնորհիվ, որտեղ առավել դիպուկ էին «Նոայի» ֆուտբոլիստները: Ի տարբերություն գավաթի եզրափակչի՝ երեկ «Արարատ-Արմենիան» խաղաց նոր մարզչի գլխավորությամբ։ Հիշեցնենք, որ Հայաստանի չեմպիոնի կոչումը նվաճելուց օրեր անց Վարդան Մինասյանը հեռացվել էր «Արարատ-Արմենիայի» գլխավոր մարզչի պաշտոնից։ Նրան փոխարինել է իսպանացի մասնագետ Դավիթ Կամպանյան։ «Նոայի» հետ մրցավեճը Կամպանիայի համար նորամուտի խաղն էր, որը ըստ էության չստացվեց։ «Նոան» կրկին կամային հաղթանակ տարավ՝ ապացուցելով, որ կայացած և մարտունակ ակումբ է։ Մեկ շաբաթ անց Չեմպիոնների լիգայի խաղարկության որակավորման երկրորդ փուլի շրջանակներում «Արարատ-Արմենիան» մրցելու է Կիպրոսի չեմպիոն «Օմոնիայի» հետ։ Կարո՞ղ ենք արդյոք ասել, որ չեմպիոնը պատրաստ է կարևոր այդ խաղին։ Հուլիսի 14-ին Բարձրագույն խմբի առաջնության վերջին տուրում «Նոային» 2։0 հաշվով հաղթելուց հետո «Արարատ-Արմենիան» երկրորդ տարին անընդմեջ դարձել էր չեմպիոն։ Երեք օր անց երևանյան ակումբը հանդես եկավ հայտարարությամբ՝ տեղեկացնելով, որ գլխավոր մարզիչ Վարդան Մինասյանի հետ ավարտված պայմանագիրը չի երկարաձգվելու։ «Արարատ-Արմենիայից» հեռացել են նաև առաջատար խաղացողներ Ռուժդի Աշենտեն, Դմիտրի Գուզը և Անտոն Կոբյալկոն։ Նշենք, որ վերջին երկու տարիներին Մինասյանը մեծ աշխատանք էր կատարել այս թիմում։ Առաջին անգամ մասնակցելով Հայաստանի առաջնությանը՝ «Արարատ-Արմենիան» դարձավ չեմպիոն և փայլուն ելույթ ունեցավ եվրագավաթների խաղարկությունում՝ դուրս գալով Եվրոպա լիգայի փլեյ-օֆ։ Այո, «Արարատ-Արմենիան» միևնույն ժամանակ համալրվել է մի քանի նոր ֆուտբոլիստներով։ Բայց կարո՞ղ է արդյոք մեկ-երկու շաբաթ առաջ թիմին միացած նույնիսկ բարձրակարգ ֆուտբոլիստը նման մակարդակի հանդիպումներում օգուտ տալ թիմին: Վստահաբար կարող ենք ասել, որ Մինասյանի գլխավորությամբ «Արարատ-Արմենիան» ցուցադրում էր ամենաբալանսավորված խաղը։ Երեկ մեր չեմպիոնի խաղն այն չէր։ Որքանո՞վ էր ճիշտ Չեմպիոնների լիգային ընդառաջ ըստ էության զրկվել գլխավոր մարզչից։ Մեկնաբանությունները, կարծում ենք, ավելորդ են։ Մնում է հուսալ թերևս, որ «Օմոնիայի» դեմ մրցավեճում «Արարատ-Արմենիան» կցուցադրի ուրիշ ֆուտբոլ։