Վերջին ամիսներին Հայաստանի ազգային հավաքականը համալրեցին մի քանի նոր ֆուտբոլիստներ, որոնց հետ ֆուտբոլասերը մեծ հույսեր է կապում։ Արդեն իսկ պարզ է, որ սեպտեմբերին մեկնարկելիք Ազգերի լիգայի խաղարկությանը Հայաստանի հավաքականը կներկայանա թարմացված կազմով։ Նշանակալի ձեռքբերում կարելի է համարել «Ռոստովի» կիսապաշտպան Խորեն Բայրամյանին։ Վերջինս տևական բանակցություններից հետո ի վերջո համաձայնեց խաղալ մեր հավաքականում։ Լեգեոներների վերաբերյալ Ռուսաստանի ֆուտբոլի միության որոշումից հետո «Խիմկիում» ելույթ ունեցող կիսապաշտպան Արշակ Կորյանը ևս համաձայնեց կրել մեր ազգային թիմի մարզաշապիկը։ Նոր ֆուտբոլիստներով համալրվելուն զուգահեռ՝ ավելացել է նաև մեր ազգային թիմի ընդհանուր տրանսֆերային արժեքը։ Ըստ «Տրանսֆերմարկետ» պարբերականի՝ Բայրամյանի տրանսֆերային արժեքը կազմում է 2.8 միլիոն եվրո։ Ի դեպ, վերջին մեկ ամսվա ընթացքում այս ֆուտբոլիստի տրանսֆերն աճել է 600 հազար եվրոյով։ Արշակ Կորյանի տրանսֆերային արժեքն էլ կազմում է 550 հազար եվրո։ Ինչևէ, կորոնավիրուսի համավարակի հետևանքով ֆուտբոլային մրցաշրջանի հետաձգվելը տրանսֆերային շուկայում ֆուտբոլիստների արժեքի անկման պատճառ էր դարձել։ Վերջին մեկ ամսվա ընթացքում, սակայն, այնուամենայնիվ որոշակի դրական տեղաշարժեր նկատելի են։ Ըստ «Տրանսֆերմարկետ» պարբերականի՝ համավարակից հետո ֆուտբոլի Հայաստանի ազգային հավաքականի և «Ռոմայի» կիսապաշտպան Հենրիխ Մխիթարյանի տրանսֆերային արժեքը նվազել է 5 միլիոն եվրոյով և այժմ կազմում է 20 միլիոն եվրո։ Վերջին մեկ ամսվա ընթացքում Մխիթարյանի տրանսֆերը փոփոխությունների չի ենթարկվել։ Համավարակի հետևանքով անկում են ապրել նաև Հայաստանի ազգային հավաքականի մյուս առաջատար ֆուտբոլիստների տրանսֆերային արժեքները։ Մինչև համավարակի բռնկումը Հայաստանն ուներ 5 ֆուտբոլիստներ, որոնց տրանսֆերային արժեքը գերազանցում էր մեկ միլիոն եվրոն։ Այսօր ունենք բոլորովին այլ պատկեր։ Եվ այսպես. Մխիթարյանից հետո հայաստանցի երկրորդ ամենաթանկ ֆուտբոլիստի՝ գերմանական «Հոֆենհայմի» հարձակվող Սարգիս Ադամյանի տրանսֆերը նվազել է մեկ միլիոն եվրոյով և այժմ 4 միլիոն եվրո է։ Չի բացառվում, որ Ադամյանի տրանսֆերը շարունակի նվազել։ Բանն այն է, որ ծանր վնասվածքի պատճառով Ադամյանը տևական ժամանակ խաղադաշտ դուրս չի եկել։ 300 հազար եվրոյով նվազել է մեր հավաքականի մեկ այլ առաջատար ֆուտբոլիստի՝ Ղազախստանի չեմպիոն «Աստանայի» հարձակվող Տիգրան Բարսեղյանի տրանսֆերային արժեքը և հիմա կազմում է 1.2 միլիոն եվրո։ «Ուրալում» հանդես եկող մեր հավաքականի պաշտպանական գծի առաջատար Վարազդատ Հարոյանի տրանսֆերն էլ նվազել է 400 հազար եվրոյով և կազմում է 800 հազար եվրո։ Ամենաթանկ հայաստանցի ֆուտբոլիստների լավագույն հնգյակում գտնվող ղազախական մեկ այլ ակումբի՝ «Կայրաթի» ներկայացուցիչ Կամո Հովհաննիսյանի տրանսֆերային արժեքն էլ նվազել է 200 հազար եվրոյով և հիմա 800 հազար եվրո է։ Այս պահին Հայաստանը՝ ի դեմս Հենրիխ Մխիթարյանի, Խորեն Բայրամյանի, Սարգիս Ադամյանի և Տիգրան Բարսեղյանի, ունի 4 ֆուտբոլիստներ, որոնց տրանսֆերային արժեքը գերազանցում է մեկ միլիոն եվրոն։ 6 ամիս առաջ ունեինք նաև երկու ֆուտբոլիստներ, որոնց տրանսֆերային արժեքը մոտ էր միլիոնի շեմին։ Խոսքը շվեդական «Գյոթեբորգի» պաշտպան Անդրե Չալըշըրի և դանիական «Հոբրոյի» կիսապաշտպան Էդգար Բաբայանի մասին է։ Վերջինիս տրանսֆերային արժեքը նվազել էր՝ հասնելով 474 հազար եվրոյի։ Դանիայի առաջնության վերսկսումից հետո Բաբայանի տրանսֆերային արժեքը կրկին բարձրացավ՝ հասնելով 700 հազար եվրոյի։ Եթե Չալըշըրի տրանսֆերային արժեքը 800 հազար եվրո էր, ապա այն նվազելով՝ հասել է 650 հազար եվրոյի։ Ընդհանուր առմամբ, եթե 4 ամիս առաջ Հայաստանի ազգային հավաքականի ֆուտբոլիստների տրանսֆերային ընդհանուր արժեքը կազմում էր 35 միլիոն եվրո, ապա մեկ ամիս առաջ այդ թիվը նվազել է՝ հասնելով 28.3-ի։ Բայրամյանի և մյուս նորեկների շնորհիվ ՀՀ հավաքականի ընդհանուր արժեքը ավելացել է և այսօր կազմում է 3.58 միլիոն եվրո։ Նշենք, սակայն, որ համավարակի հետևանքով անկում են ապրել գրեթե բոլոր ֆուտբոլիստների տրանսֆերային արժեքները։ Ըստ մամուլում տարածված տեղեկությունների՝ Թուրինի «Յուվենտուսը» մտադիր է ընդամենը 70 միլիոն եվրոյով վաճառել աշխարհի լավագույն ֆուտբոլիստներից մեկի՝ Կրիշտիանու Ռոնալդուի տրանսֆերը։ Այս կերպ իտալական տիտղոսակիր ակումբը մի քանի ամիս ևս կկարողանա վճարել մյուս ֆուտբոլիստների աշխատավարձը։ Նույն «Տրանսֆերմարկետ» պարբերականը Ռոնալդուի տրանսֆերը գնահատում է 60 միլիոն եվրոյով։ Հիշեցնենք, որ «Յուվենտուսը» Ռոնալդուի տրանսֆերը Մադրիդի «Ռեալից» ձեռք էր բերել 100 միլիոն եվրոյով։ «Բարսելոնայի» և Արգենտինայի հավաքականի առաջատար Լիոնել Մեսսիի տրանսֆերը ևս զգալի նվազել է և կազմում է 112 միլիոն եվրո։