Հոկտեմբերի 27-ի վերաբացված գործով տուժողի իրավահաջորդ, 27-ի ոճրագործության զոհերից Յուրի Բախշյանի այրին՝ Անահիտ Բախշյանը դժգոհ է ԱԱԾ վարույթում գտնվող գործի քննություն ընթացքից։ Տիկին Բախշյանը «Առաջին լրատվական»-ի հետ զրույցում ասաց, որ ոչնչից տեղյակ չէ, իրեն ոչ մի բանի մասին տեղյակ չեն պահում, լրացուցիչ ցուցմունք տալու չեն կանչել։ «Ոչ մի բան չգիտեմ, թե ինչ են անում, ում են քննել, ուր են հասել, ինչ արդյունք է գրանցվել։ Ոչ մի բան չգիտեմ»,-ասաց Բախշյանը։ ԱԱԾ տնօրեն Արգիշտի Քյարամյանի նշանակումից հետո Անահիտ Բախշյանը կարծիք էր հայտնել, որ նորանշանակ ղեկավարի գործունեության արհեստավարժությունը կերևա մեր երկրի անվտանգության համար շատ ու շատ կարևոր գործերի բացահայտման ընթացքից և արագությունից, մասնավորապես Հոկտեմբերի 27-ի վերաբացված գործի քննության ընթացքից, որը, ըստ Բախշյանի, մեր հասարակության համար կունենա լակմուսի թղթի նշանակություն։ Մեր դիտարկմանը՝ քննչական մարմնի դանդաղումը ինչո՞վ է պայմանավորված՝ գործի բարդությա՞մբ, կորոնավիրուսով ստեղծված իրավիճակո՞վ, թե՞ այլ պատճառներ կան, Բախշյանը պատասխանեց․ «Չգիտեմ, հավանաբար՝ բոլորը պատճառները միասին վերցված։ ԱԱԾ նոր տնօրենը, կարծես թե, կադրային քաղաքականություն է վարում, տարբեր մարդկանց է ազատում, նորերին է բերում։ Չգիտեմ, գուցե այս պրոցեսն ավարտվի ու արդյունքներ նկատենք, բայց ես անգամ առ այս պահը չգիտեմ՝ ԱԱԾ տնօրենը հետաքրքրվա՞ծ է Հոկտեմբերի 27-ի գործով, թե՞ ոչ։ Մենք դեռ նրա արձագանքը չենք տեսել»։ Հիշեցնենք, որ Հոկտեմբերի 27-ի գործից անջատված մասով քննությունը կարճվել էր 2004-ին, որից հետո կարճման որոշումները այդպես էլ իրավահաջորդներին չէին տրամադրվել: Այս տարի Հոկտեմբերի 27-ից հետո՝ նոյեմբեր ամսին, Անահիտ Բախշյանը դիմել էր գլխավոր դատախազություն և ստացել կարճման որոշումը, որը և բողոքարկել էր։ Գլխավոր դատախազությունն էլ բավարարել էր բողոքը և որոշել կարճված մասով գործի քննությունը վերսկսել։ Գործի քննությունը, գլխավոր դատախազության որոշմամբ, հանձնարարվել էր Ազգային անվտանգության ծառայությանը։ Դեռևս այդ ժամանակ Անահիտ Բախշյանը մեզ հետ զրույցում ասել էր, որ չի վստահում ԱԱԾ-ին, քանի որ նախկինում հենց ԱԱԾ-ն է Հոկտեմբերի 27-ի գործը սխալ ճանապարհով տարել։ Բախշյանը բողոքարկել էր դատախազության որոշումը, սակայն այն մնացել էր անփոփոխ։ Այսօր Անահիտ Բախշյանն ասաց, որ զուր չէր, որ ի սկզբանե չէր վստահում ԱԱԾ-ին, բայց դեռ չի շտապի գնահատական տալ ԱԱԾ աշխատանքին Հոկտեմբերի 27-ի վերաբացված մասով քննությանը։ «Քանի որ չգիտեմ, թե ինչ է արվում գործի շրջանակներում, չեմ կարող գնահատական տալ։ Չեմ ուզում հավատալ, որ ոչինչ չի կատարվում։ Սպասենք, տեսնենք՝ ինչ կլինի, բայց ես արդեն չգիտեմ էլ, թե այս գործը այս իշխանության համար որքան է կարևոր։ Թվում է, թե կարևորել են, որ վերաբացել են, բայց թե ինչ է կատարվում այդ վերաբացված գործի շրջանակներում, չեմ կարող ասել»,- եզրափակեց Անահիտ Բախշյանը։ Նշենք, որ այս գործով վերջերս վկայի կարգավիճակով հարցաքննվել էր ԱԺ երկրորդ գումարման պատգամավոր, 2000-2003 թվականներին ՌԴ կառավարությունում ՀՀ կառավարության հատուկ ներկայացուցիչ Տարոն Սահակյանը։ Վերջինս դիմել էր, որ իրեն որպես տուժող ճանաչեն, սակայն այդ գործընթացը առ այսօր էլ ձգձգվում է։ Տարոն Սահակյանն էլ, տարբեր իրավապաշտպաններ էլ, ինչպես նաև Հոկտեմբերի 27-ի գործով տուժողների իրավահաջորդների նախկին ներկայացուցիչ, «Հանրապետություն» կուսակցության վարչության անդամ Լյովա Եղիազարյանը վերջերս մեզ հետ զրույցում հույս էին հայտնել, որ ԱԱԾ տնօրենի փոփոխությամբ կարելի է որոշակի դրական տեղաշարժեր ակնկալել Հոկտեմբերի 27-ի գործի քննության մասով, քանի որ նախկինում մշտապես խոսվել է, որ Հոկտեմբերի 27-ի գործում կա ռուսական հետք, իսկ ՀՀ ԱԱԾ-ն նախկինում մշտապես եղել է ռուսական հատուկ ծառայությունների, ռուսական շրջանակների ազդեցության տակ, եղել է դրանց մասնաճյուղներից մեկը, և այդ իսկ պատճառով Հոկտեմբերի 27-ի բացահայտումը նախկինում հնարավոր չի եղել։ Հայաստանն էլ եղել է Ռուսաստանին կպած, զուրկ ինքնիշխանությունից։ Իսկ հիմա, երբ ԱԱԾ-ն նոր ղեկավար ունի, որը ազատ է ռուսական ճնշումներից, ոչ սովորել է Ռուսաստանում, ոչ դաստիարակվել է նրանց շրջապատում, ոչ էլ ներդրված է նրանց կողմից։ «Սա նշանակում է, որ ԱԱԾ նոր ղեկավարը չպետք է կաշկանդված լինի Հոկտեմբերի 27-ի գործի բացահայտման հարցում։ Հիմա պատուհան է բացվել, որ նախկինում եղած այդ պատնեշները վերանան ու քայլեր կատարվեն գործի իրական բացահայտման ուղղությամբ»,- ասել էր Եղիազարյանը։