Գերմանիայում թուրքական մի ընտանիք «կորոնավիրուսով» նամակ է ստացել․ Ermenihaber
10:09 | 2020-04-02
Գերմանիայի Համբուրգ քաղաքում տեղաբնակ թուրք ընթտանիքը սպառնալից նամակ է ստացել անհայտ անձից։
Նշվում է, որ ծրարը իր փոստարկղում հայտնաբերել է 28-ամյա Օնդեր Քոջան, իսկ նամակի մեջ գրված է եղել, որ թղթի վրա կորոնավիրուս կա։
Թուրքական լրատվամիջոցներին տված հարցազրույցում Քոջան պատմել է, որ ապշել է նամակի բովանդակությունից։
Նամակում մասնավորապես գրված է եղել․
«Ձեզ անակնկալ ունեմ։ Ես վարակված եմ կորոնավիրուսով։ Այս նամակի վրա մի քանի անգամ հազացել եմ և չորս կողմից լիզել եմ։ Ես մենակ չեմ լքելու այս աշխարհը։ Իմ վերջին առաքելությունն է Գերմանիան առանց օտարների թողնել երեխաներիս և թոռներիս։ Մահացիր, դանդաղ մահացիր․ Գերմանիան թող մնա գերմանացիներին։ Հուսով եմ վիրուսը արագորեն կտարածվի ձեր ընտանիքում»։
Թուրք տղամարդն ասել է, որ ընթերցելուց անմիջապես հետո ձեռքերն ախտահանել է և դիմել ոստիկանություն։
Դեպքի մասին նա նաև հայտնել է Համբուրգի թուրքական հյուպատոսությանը։
Քոջան օգնության է դիմել Համբուրգի բժիշկներին, որոնք հայտնել են, որ թղթից վարակի անցման հավանականությունը շատ ցածր է։ Չնայած այս ամենին՝ նա 1 շաբաթ աշխատանքի չի գնացել և մնացել է տանը։
Նշենք, որ թուրքական աղբյուրը պնդում է, որ այս նամակի հեղինակը կամ հեղինակները ռասիստ գերմանացիներն են։
Հիշեցնենք, որ փետրվար և մարտ ամիսներին նման ևս 3 դեպք էր գրանցվել Գերմանիայի տարբեր քաղաքներում: