Եղիսաբեթ Երկրորդը ստորագրել է ԵՄ-ից Բրիտանիայի դուրս գալու վերաբերյալ օրինագիծը
21:35 | 2020-01-23
Մեծ Բրիտանիայի թագուհի Եղիսաբեթ Երկրորդը հավանություն է տվել Brexit-ի օրինագծին, որը պատրաստվել է Վարչապետ Բորիս Ջոնսոնի կառավարության կողմից: Այդ մասին հայտնում է Sky News-ը՝ հղում անելով երկրի Համայնքների պալատի անդամ Նայջել Էվանսին:
Հրապարակման համաձայն՝ Ջոնսոնի՝ Brexit-ի վերաբերյալ գործարքը պաշտոնապես դարձել է բրիտանական օրենք: Փաստաթուղթը ստորագրվել է թագուհու կողմից հինգշաբթի՝ հունվարի 23-ին, և Էվանսը տեղեկացրել է պատգամավորներին դրա մասին:
Հատկանշական է, որ օրինագծի ստորագրման վերաբերյալ դեռևս պաշտոնական հայտարարություն չի եղել:
Եթե այս տեղեկատվությունը հաստատվի, ապա հունվարի 31-ին Բրիտանիան կհեռանա Եվրամիությունից: