Tesla Motors նորարարական ընկերությունը ծրագրում է ավտոմեքենայի մաքրիչները փոխարինել լազերով, հայտնում է Electrek-ը: Պարբերականի տվյալների համաձայն, ընկերությունը լազերային սարք է արտոնագրել, որը կփոխարինի ավտոմեքենայի մաքրիչներին: Հաղորդվում է, որ դրանք միանալու են ավտոմատ կերպով: Դա հնարավոր կլինի սենսորների շնորհիվ, որոնք կճանաչեն ապակու մաքրությունը: Լազերային սարքը մաքրելու է ոչ միայն դիմապակին, այլ նաև կողային պատուհանների ապակիները և հետևի հայելիները: Լազերային «մաքրիչների» աշխատանքի համար ոչ մի հեղուկ չի պահանջվի: Սակայն հայտնի չէ, թե ինչպես է լազերը գործելու ուժեղ անձրևի ժամանակ և որքան անվտանգ են դրանք վարորդի և ուղևորների տեսողության համար: