Միլանում՝ հայկական եկեղեցում տեղի հայերի հետ վարչապետ Նիկոլ Փաշինյանի հանդիպմանը որպես ադրբեջանցի բլոգեր ներկայացած անձը փորձեց սադրանք հրահրել։ Նիկոլ Փաշինյանը նկատեց, որ ադրբեջանցին մտել է հայկական եկեղեցի, և հարց է տալիս Հայաստանի վարչապետին և գտնվում է անվտանգության մեջ, սակայն անհնար է պատկերացնել հակառակը՝ երբ հայը մտնի ադրբեջանական մզկիթ ու անկաշկանդ հարց տա Իլհամ Ալիևին։ Ադրբեջանցի բլոգերը հայերին մեղադրում էր Խոջալուում ցեղասպանություն իրականացնելու մեջ: Վարչապետն ի պատասխան նշեց, որ դա բացարձակ սուտ է և հիշեցրեց, որ Ադրբեջանի նախկին նախագահներից մեկը՝ Այազ Մութալիբովն է ընդունել, որ Խոջալուի դեպքերը կազմակերպել է ադրբեջանական ընդդիմությունը՝ երկրում հեղափոխություն իրականացնելու համար։ Ադրբեջանցին խոսեց խաղաղությունից, ինչին վարչապետն արձագանքեց, որ ինքն առաջարկել է խաղաղության բանաձևը Իլհամ Ալիևին։ Փաշինյանը հիշեցրեց, որ ինքը Ալիևին ասել է՝ Արցախյան հակամարտության կարգավորման ցանկացած տարբերակ պետք է ընդունելի լինի Հայաստանի, Արցախի ժողովրդի և ադրբեջանցիների համար։ Փաշինյանը կոչ արեց, որ Ալիևը նույնը կրկնի։ Փաշինյանը նաև ընդգծեց, որ այն նույն ժամանակ, երբ Ադրբեջանը դուրս է եկել ԽՍՀՄ կազմից, հենց այդ ժամանակ էլ Լեռնային Ղարաբաղը դուրս է եկել ադրբեջանական կազմից և հստակ ինքնորոշում իրականացրել: Մանրամասն՝ տեսանյութում: