Հայաստանի ֆուտբոլի ազգային հավաքականը Եվրոպայի առաջնության ընտրական փուլի վերջին հանդիպման ժամանակ՝ 90 րոպեում 9 գնդակ ընդունեց սեփական դարպասը աշխարհի քառակի չեմպիոն Իտալիայի ազգային հավաքականից։ Սա անկախ Հայաստանի պատմության ամենախոշոր հաշվով պարտությունն էր։ Պարտություն, որը խայտառակություն որակեց ողջ ֆուտբոլային հանրությունը։ Սա այն դեպքում, երբ մեր ընտրանու կազմում միանգամից 5 պաշտպան էր խաղում, ինչպես նաև 2 հենակետային։ Ի՞նչ է կատարվում հայկական ֆուտբոլում, ինչո՞ւ հնարավոր եղավ նման խոշոր հաշվով պարտությունը, և ո՞վ է դրա գլխավոր պատասխանատուն․ «Առաջին լրատվական»-ի հարցին ֆուտբոլիստ, հայկական ֆուտբոլի լեգենդ Խորեն Հովհաննիսյանը պատասխանեց․ «Շատ ցավալի պարտություն էր։ Մենք պետք է շատ արագ մոռանանք, բայց դրանից մենք պետք է հետևություն անենք։ Մենք միշտ մեղադրում էինք Ռուբեն Հայրապետյանին, որ 17 տարի միայն նա էր ղեկավարում՝ պատասխանատուն միայն ինքն էր։ Իսկ էսօրվա համար ո՞վ ա պատասխանատու, ո՞ւմից պետք է դա պահանջենք։ Այսօր բոլոր կողմերից «հարձակվել են» ֆեդերացիայի նախագահի վրա, բայց ես գտնում եմ, որ սրա համար բոլորը պետք է պատասխան տան՝ և՛ ֆեդերացիայի նախագահը, և՛ մարզիչը, և՛ ֆեդերացիայի գործկոմը»։ Վերջերս շատ քննարկվեց նաև մարզիչի ընտրությունը, թե արդյոք Խաշմանյանը լավագո՞ւյն տարբերակն էր։ Հնարավո՞ր չէր Խաշմանյանի փոխարեն նշանակել վերջին մեկուկես տարում հավաքականի հետ աշխատած մարզչական շտաբի անդամներից որևէ մեկին, փրկել իրավիճակը, հետագայում նորմալ ընտրություն կատարել․ «Առաջին լրատվական»-ի հարցին Խորեն Հովհաննիսյանը պատասխանեց․ «Արդեն մեկուկես տարի է՝ այդ մարդիկ ֆեդերացիայի գործկոմի անդամներ են, բայց իրենք էլ չգիտեն՝ իրավունք ունե՞ն մարզիչ նշանակելու, թե՞ ոչ։ Պարզվում է, որ վերջին չորս ամիսներին գործկոմն իրավասու չէ որևէ որոշում կայացնելու համար։ Վանեցյանը գնաց հին մեթոդով, այսինքն՝ միայն ինքը որոշի ու կարողանա անել։ Ես շատ կուզեի իմանալ, թե ֆուտբոլային մասնագետներից ո՞վ է նրա կողքին կանգնած, ո՞ւմից է նա խորհուրդ հարցնում։ Նրա կողքին ոչ մի ֆուտբոլային մասնագետ չկա։ Փաստորեն գնում է նրան, որ նա էլ Հայրապետյանի նման ցանկանում է միանձնյա որոշում կայացնել, որովհետև երեկ գործկոմը հայտարարեց՝ իրավասու չէ, կամ էլ տեղյակ չէ։ Էդ դեպքում ինչի համար եք գործկոմում աշխատում»։     Մանրամասները՝ տեսանյութում։