Էրդողանը արգելել է վեյպերը՝ փոխարենը թուրքերին առաջարկելով թեյ խմել
19:35 | 2019-10-21
Թուրքիայի նախագահ Ռեջեփ Թայիփ Էրդողանը հայտարարել է, որ թույլ չի տա էլեկտրոնային ծխախոտ արտադրողներին իրենց արտադրանքը տարածել իր երկրում: Նա հայրենակիցներին հորդորել է փոխարենը թեյ խմել: Այս մասին հայտնում է Reuters- ը:
Էրդողանը բարձրաձայնել է իր դիրքորոշումը Ստամբուլում ծխելու դեմ պայքարի շրջանակում: Նա ասել է, որ Թուրքիայի առևտրի նախարարին հրամայել է երկրում «երբեք թույլ չտալ» էլեկտրոնային ծխախոտը: Նախագահը բացատրել է, որ ծխախոտային ընկերությունները «իրենց հարստացնում են մարդկանց թունավորելով»:
Էրդողանը հավելել է, որ ընկերությունը արդեն թույլտվություն է խնդրել էլեկտրոնային ծխախոտ արտադրելու համար և մերժվել է: Նախագահի խոսքով՝ ինքը չի պատրաստվում փոխել իր որոշումը:
«Նրանք ցանկանում են ներդրումներ կատարել Թուրքիայում ... Գնացեք և կատարեք ձեր ներդրումները այլուր»,- ասել է Թուրքիայի ղեկավարը: