Արդարադատության նախարարությունը օրերս հանդես եկավ Վենետիկի հանձնաժողովի արձանագրության շահարկումների վերաբերյալ պարզաբանմամբ՝ նշելով, որ Հայաստանի իշխանության ու հանձնաժողովի մոտեցումները ամենևին հակասական կամ հակադիր չեն, այդ թվում՝ դատավորների վեթինգի ենթարկելու վերաբերյալ: Սակայն արդարադատության նախարարության հայտարարության մեջ ամենահետաքրքիրը, թերևս, այն էր, որ նախարարությունն ազդարարել էր առաջիկայում այդ թեմայով վարչապետ Նիկոլ Փաշինյանի հայտարարության մասին: Այսօր արդեն վարչապետ Նիկոլ Փաշինյանը հարցազրույց է տվել «Ազատություն» TV-ին, որտեղ հարցերի լայն շրջանակ է ներառվել: Թեմայի շուրջ «Առաջին լրատվական»ի հետ քննարկմանը մասնակցեցին «Իմ քայլը» խմբակցության պատգամավոր Սուրեն Գրիգորյանը, քաղաքագետ Ստեփան Սաֆարյանը և Իրավաբանների հայկական ասոցիացիայի հակակոռուպցիոն փորձագետ Սյուզան Սողոմոնյանը: Պատասխանելով հարցին, թե որն է ամենամեծ ձեռքբերումը իր կառավարման 14 ամիսների ընթացքում, վարչապետը նշել է, որ ամենամեծ ձեռքբերումը Հայաստանի ժողովրդավարությունն է և երկրի ժողովրդավարական իմիջը: Նա նաև հիշեցրել է, որ 2018թ. Հայաստանում տեղի ունեցած խորհրդարանական ընտրությունները չեն վիճարկվել ո՛չ քաղաքական, ո՛չ հասարակական հարթակներում, ինչը բացառիկ իրադարձություն է: Անդրադառնալով այս դիտարկմանը՝ Ստեփան Սաֆարյանը նույնպես պնդեց, որ իսկապես Հայաստանը չափազանց կարևոր քայլ կատարեց դեպի ժողովրդավարություն: «Իհարկե, այն դեռևս չենք համարի անշրջելի և ավարտուն, որովհետև ժողովրդավարությունը միայն ընտրությունները չեն, այլ նաև այն ամենօրյա ռեժիմը, որ թույլ է տալիս մարդու իրավունքների և ազատությունների լիարժեք իրացում: Այս առումով Հայաստանը դեռ երկար ճանապարհ կանցնի, ակնհայտ է, որ խոշոր քայլը կատարված է...»: Հարցազրույցում անդրադարձ եղավ նաև թիմի անփորձությանը և կադրային քաղաքականությանը և վարչապետը նշեց. «Մեր քաղաքական թիմը այն քաղաքական թիմն է, որն ապահովել է Հայաստանի Հանրապետությունում ոչ բռնի, թավշյա հեղափոխության հաղթանակը: Այդ քաղաքական թիմը կարողացել է ինչ-որ առումով առաջնորդել ժողովրդին և շարունակում է առաջնորդել և վայել ժողովրդի վստահությունը: Եվ այդ քաղաքական թիմը ունի բավարար հմտություններ երկիրը կառավարելու...»: Անդրադառնալով այս դիտարկմանը՝ Սուրեն Գրիգորյանը հավելեց, որ վարչապետը նաև ընդունել է, որ ամեն ինչ կատարյալ չէ, և կա կառավարման խնդիր, և որ դա օրակարգային հարց է, որի  ուղղությամբ անընդհատ աշխատանք է տարվում: Պատգամավորի խոսքով՝ կադրային քաղաքականության հետ կապված մտահոգությունները լեգիտիմ են, բայց չպետք է դրանք ուռճացնել: Ս. Սողոմոնյանը, ի թիվս այլ հարցերի, անդրադարձավ Վահե Գրիգորյանի նամակի վերաբերյալ վարչապետի դիտարկումներին, ՍԴ շուրջ ստեղծված թնջուկին, վեթինգին:   Մանրամասն՝ տեսանյութում: