13 հուլիսի 2019 թ., Երևան. Beeline-ը հայտարարում է ֆիքսված հեռախոսակապի երեք նոր սակագնային փաթեթների գործարկման մասին՝ իրավաբանական անձանց համար։ Հետվճարային սակագնային փաթեթների թարմացված տեսականին բիզնեսին առաջարկում է փաթեթում ներառված խոսելաժամանակ, որը կարելի է օգտագործել Հայաստանի, Արցախի, ԱՄՆ-ի, Կանադայի և Չինաստանի բոլոր ֆիքսված և բջջային ցանցերին, ինչպես նաև Ռուսաստանի Beeline ցանցի  հեռախոսահամարներին զանգահարելու համար: Նոր շարքի սկզբնական սակագնային փաթեթն է «Բիզնես 4900» այլընտրանքայինը, որն ամսական 4900 դրամի դիմաց բաժանորդին տրամադրում է 450 րոպե ներառված խոսելաժամանակ և անսահմանափակ զանգեր «փակ խմբի» ներսում: Առաջատար «Բիզնես 9900» այլընտրանքային փաթեթը ներառում է ամսական 1100 րոպե խոսելաժամանակ: «Մենք Beeline-ում ուշադրությամբ հետևում ենք բաժանորդներից ստացվող հետադարձ կապին: Բիզնես սեգմենտի  մեր գործընկերները ցանկացել են տեսնել խոսելաժամանակի փաթեթ, որը հնարավոր կլիներ օգտագործել ոչ միայն տեղական ուղղությունների, այլև արտասահմանյան զանգերի համար: Այժմ մեր գործընկերներին ներկայացնում ենք սակագնային փաթեթների նոր շարք, որում առավելապես հաշվի են առնվել նրանց առաջարկությունները: Վստահ եմ, որ բիզնես սեգմենտը  կգնահատի մեր ֆիքսված հեռախոսակապի նոր ունիվերսալ առաջարկը», - նշեց Հայաստանում Beeline-ի գլխավոր տնօրեն Անդրեյ Պյատախինը։