«Ամեն կերպ ուզում են խեղաթյուրել իրականությունը, մի օր մի բան են ասում, մյուս օրն՝ ուրիշ բան, սկզբից ինչ-որ բան չեն ընդունում, հետո ընդունում են: Քոչարյանն իր ասածները մե՛կ հերքում է, մե՛կ հաստատում: Իրականությունը դուրս է գալու ջրի երես»,- «Առաջին լրատվական»-ի հետ զրույցում այս մասին ասաց ՀՀ պաշտպանության նախկին փոխնախարար Գագիկ Մելքոնյանը՝ անդրադառնալով Ռոբերտ Քոչարյանի դատավարությանը և նրա շուրջ ծավալված իրադարձություններին: Հարցին, թե արդյոք նորություն հնչեց դատարանի դահլիճում, Գ. Մելքոնյանը նշեց. «Առաջին անգամ լսեցի, որ Ռոբերտ Քոչարյանն ասաց. «Թող ապացուցեն, որ Ղարաբաղից գոնե մի զինվոր է բերվել Հայաստան»: Այո՛, մի զինվոր չի եկել, շատ զինվորներ են եկել, բայց նա ժխտում է այդ փաստը, ինչպե՞ս կարող է զինվորական ստորաբաժանման տեղաշարժ լինել մի հանրապետությունից մյուս հանրապետություն, և երկրի նախագահը դրանից տեղյակ չլինի: Այդպիսի տեղաշարժին տեղյակ է լինում Գլխավոր շտաբի պետը, պաշտպանության նախարարները, Հայաստանի և Արցախի նախագահները: Արցախից զինվոր բերելու հիմնական պատճառն այն է, որ չեն վստահել մեր զինվորականներին: 18 տարեկան զինվոր չի եկել Հայաստան, պայմանագրային հիմունքներով սպաներ և ենթասպաներ են եղել»: «00-38 հրամանով ամեն մեկը պարզ ստացել է իր հանձնարարությունը և կատարել. դա պաշտպանության նախարարի հրամանն է: Երկրորդ նախագահը գիտի՝ ով է հրաման տվել…,- նշեց նախկին փոխնախարարը:- Սամվել Բաբայանն էլ է ասում, որ կրակելու հրաման եղել է Կառավարության շենքից, ոչ թե Բաղրամյան 26-ից: Բաղրամյան 26-ում Ռ. Քոչարյանն էր, իսկ Կառավարությունում նստած էր նոր իշխանությունը՝ Սերժ Սարգսյանը՝ իր շտաբով: Քոչարյանն ասում է, որ ինքը տեղյակ չէ, ես մտածում եմ, որ դա անհնարին է, կարող է հրաման չի տվել, բայց չէր կարող տեղյակ չլինել նման իրավիճակում»: «Ալումյանը բազում անգամներ իր թիմով անընդհատ մեզ վրա է ուզում գցել մեղավորությունը՝ ամեն անգամ մի բան ասելով: Ես եղել եմ պաշտպանության նախարարի տեղակալ, իմ ենթակայության տակ զորքեր չեն եղել, ես ուղղակի ասել եմ, որ պետք չէ զորք մտցնել Երևան, հազիվ ժողովուրդը բանակն ընդունում է որպես իր երախայի, մի արեք այնպես, որ նորից հիասթափվի: Մենք չենք ուզեցել, որ զորք բերվի Երևան՝ ասելով, որ կան ներքին զորքեր, թող նրանք զբաղվեն երկրի կարգուկանոնը պահպանելով: Ցուցարարների իբրև թե  զինված լինելու մասին հեռուստացույցով կադրեր ցույց տվեցին՝ արկղերով չօգտագործված զենքեր էին. ամեն մեկն էլ կհասկանար, որ դա ինչ-որ տեղից բերած դրած է, ցույց չտվեցին՝ ո՞ւմ մոտից են վերցրել, զենքերը թողեցին փախա՞ն: Ցույց տված կադրերը չէին համապատասխանում իրականությանը: Լարվածությունը մեղմելու, արյունահեղությունը կանխելու համար Սեյրան Օհանյանին առաջարկեցինք հանդիպել Սերժ Սարգսյանին, Ս. Օհանյանը գնաց, եկավ ասաց, որ մինչև ժամը 7-ը պատասխան կտան: Արդեն յոթն անց էր, Ս. Օհանյանն ասաց, որ բանակցելու առաջարկը իշխանությունը մերժեց»,- նշեց Գ. Մելքոնյանը: Նախկին փոխնախարարը կոչ արեց, որ ով սխալներ է թույլ տվել երկրի հանդեպ, պատասխանատվություն կրի. «Ասում էիք՝ մեր դեմ խաղ չկա, դե տղամարդավարի՛ պահեք ձեզ, տղամարդու նման խոստովանե՛ք ձեր մեղքը և երկիրը մի՛ խառնեք իրար: Ես մտահոգ եմ մեր միասնության համար, մեր միասնությունը պիտի կարողանանք պահել»: Մանրամասն՝ տեսանյութում: