Արդեն մի քանի օր է՝ հազարավոր մարդիկ բողոքի ցույցեր են անում Հայաստանի մայրաքաղաքում նախկին նախագահի կողմից վարչապետի պաշտոնը ստանձնելու դեմ: Հայաստանի բնակիչներն իրենց դժգոհությունն են հայտնում երկրում տիրող քաղաքական իրավիճակից՝ գրում է շվեյցարական Neue Zürcher Zeitung լրատվամիջոցը: Նախկին նախագահ Սերժ Սարգսյանի կողմից վարչապետի պաշտոնի ստանձնումը նրա համար հետքայլ չէ. 2015թ. ընդունված սահմանադրական փոփոխությունների համաձայն՝ Հայաստանում առաջին դեմքը ոչ թե նախագահն է, այլ վարչապետը: Ի տարբերություն նախագահական պաշտոնի, որի ժամկետը սահմանափակ է, վարչապետի պաշտոնում Սերժ Սարգսյանը կարող է գտնվել այնքան ժամանակ, որքան կստանա ձայների մեծամասնությունը: Անցած ուրբաթ օրվանից սկսած՝ Երևանի փողոցներ ավելի ու ավելի շատ մարդիկ են դուրս գալիս: Բողոքի ցույցի առաջնորդ Նիկոլ Փաշինյանի և նրա համախոհների կարծիքով՝ իշխանության բուրգի վերին մասում ուժերի դասավորվածությունը ևս մեկ ապացույց է, թե որքան անհաղորդ են քաղաքական ուժերը հասարակական կարծիքին: Սերժ Սարգսյանը 2015թ. փոփոխություններ մտցրեց սահմանադրության մեջ որպես իշխանության ժողովրդական վերահսկողության ամրապնդման երաշխիք: Եթե Սարգսյանը չհերքեր այն փաստարկները, որ նա միանձնյա է ղեկավարում երկիրը, ապա խորհրդարանական համակարգը կարող էր իսկապես առաջ բերել բազմակարծության զարգացում: Այնուամենայնիվ, այժմ քաղաքականությունը, հավանաբար, կշարունակվի հին ոճով: Վատ տնտեսական իրավիճակից դժգոհությունը, շատերի համոզմամբ՝ Ռուսաստանից ունեցած չափազանց մեծ կախվածությունը և Եվրամիության հետ շատ թույլ կապը ավելի ու ավելիեն իրենց արտահայտումն են գտնում փողոցային ցույցերում, քան բանավեճերում: Բնակչությունը քննադատաբար, թեպետ իրատեսորեն է վերաբերվում Ռուսաստանի հետ Հայաստանի ամուր կապին: Դա կենսական անհրաժեշտություն ունի երկրի համար, քանի որ այն գտնվում է թշնամական հարաբերությունների մեջ հարևան Թուրքիայի և Ադրբեջանի հետ: Հայաստանի բնակիչների մեծ մասը, սակայն, կողմ է Եվրոպայի հետ մերձեցմանը, սակայն Սերժ Սարգսյանից դա ակնկալել հնարավոր չէ: