Միջազգային էներգետիկ գործակալությունը կանխատեսում է ԱՄՆ-ում նավթի արդյունահանման «պայթյունային» աճ՝ եռամսյա առավելագույն ցուցանիշների վրա նավթի արժեքի հաստատման ֆոնին։ «Այս տարին խոստանում է ռեկորդային լինել ԱՄՆ-ի համար»,-ասվում է գործակալության ամենամսյա հաշվետվությունում, փոխանցում է Investing.com ռեսուրսը։ Գործակալությունը կարծում է, որ 2018 թվականը մեծ տատանողականություն կբերի նավթի համաշխարհային շուկային՝ աշխարհաքաղաքական անորոշության պատճառով։ Վենեսուելայում նավթի արդյունահանման ծավալների անկումը կփոխհատուցեն ԱՄՆ-ը, Կանադան և Բրազիլիան։ ՕՊԵԿ-ի կազմի մեջ չմտնող երկրներում նավթի արդյունահանման մակարդակի աճի կանխատեսումը գործակալությունը բարձրացրել է 100 հազար բարելով՝ հասցնելով օրական 1.7 մլն բարելի։ ԱՄՆ-ում արդյունահանման աճի կանխատեսումը բարձրացվել է 240 հազար բարելով՝ հասցվելով օրական 1.35 մլն բարելի։ Հունվարի 19-ի դրությամբ՝ Brent նավթի մարտի ֆյուչերսների արժեքը լոնդոնյան ICE Futures բորսայում նվազել է 0,68 դոլարով (0,98%)՝ հասնելով մեկ բարելի դիմաց 68.63 դոլարի։ WTI նավթի փետրվարի ֆյուչերսների արժեքը նյույորքյան NYMEX բորսայում էժանացել է 0,78 դոլարով (1,2%)՝ հասնելով մեկ բարելի դիմաց 63,17 դոլարի։