Ֆանտասիկ մրցաշրջանի ավարտը. Ինչու Արոնյանը չփայլեց նաև Լոնդոնում
14:00 | 2017-12-12
Լոնդոնում ավարտված շախմատի London Chess Classic խոշոր մրցաշարի վերջին տուրում Լևոն Արոնյանը սպիտակ խաղաքարերով պարտվեց աշխարհի չեմպիոն նորվեգացի Մագնուս Կարլսենին: Մի պահ թվում էր, թե Արոնյանին կհաջողվի հաղթել աշխարհի չեմպիոնին, սակայն վերջնախաղում նորվեգացի գրոսմայստերը հմտորեն օգտվեց մեր գրոսմայստերի սխալից: 9 հնարավորից վաստակելով 4 միավոր՝ Արոնյանը զբաղեցրեց միայն 7-րդ հորիզոնականը: Այս արդյունքը, ինչ խոսք, գոհացնող չես անվանի: Մինչև Կարլսենի հետ հանդիպումը Արոնյանն 8 անընդմեջ ոչ-ոքի էր խաղացել, և թվում էր, թե մեր գրոսմայստերը լոնդոնյան մրցաշարում կավարտի ելույթն առանց պարտության: Մոտ երեք շաբաթ առաջ Արոնյանը մասնակցել էր ՖԻԴԵ-ի «Գրան պրիի» վերջին՝ չորրորդ փուլին և միայն լրացուցիչ ցուցանիշներով էր առաջին հորիզոնականը զիջել ռուսաստանցի Դմիտրի Յակովենկոյին: Այս մրցաշարում Արոնյանը 9 հնարավորից վաստակել էր 5.5 միավոր: Ավելի վաղ Արոնյանը փայլուն ելույթով աչքի էր ընկել Եվրոպայի թիմային առաջնությունում առաջին խաղատախտաի վրա՝ արժանանալով ոսկե մեդալի: 2017 թվականի Արոնյանի գլխավոր նվաճումը Թբիլիսիում տեղի ունեցած աշխարհի գավաթի խաղարկության հաղթողի կոչումը նվաճելն էր:
Նշենք նաև, որ մեր գրոսմայստերն այս տարի հաղթող էր դարձել մի քանի գերմրցաշարերում: London Chess Classic մրցաշարը լուսաբանող լրատվամիջոցները, ինչպես նաև շախմատային փորձագետները Արոնյանի ոչ այնքան հաջող ելույթը կապում են հոգնածության հետ: «Ուղղակի անհնար է տարին 12 ամիս խաղալ նույն մակարդակի շախմատ: Արոնյանի մոտ դեռևս ՖԻԴԵ-ի Գրան Պրիի վերջին տուրում նկատվում էր հոգնածություն: Հայ շախմատիստը չէր ցանկանում ռիսկի դիմել և շարունակ ոչ-ոքի էր խաղում: Աշխարհի գավաթի խաղարկությունում նա ահռելի քանակության էներգիա վատնեց: Շատ գրոսմայստերներ նման նվաճումից հետո երկար ժամանակ կհանգստանային, բայց մեծ հաղթանակից հետո հայ գրոսմայստերը գերազանց հանդես եկավ Եվրոպայի թիմային առաջնությունում:
Չմոռանանք, որ Աշխարհի գավաթի խաղարկությունից հետո Արոնյանը ամուսնացավ և որոշ ժամանակ կտրվեց շախմատիստ: Փաստ է, որ Արոնյանը ուղղակի ֆանտաստիկ մրցաշրջան անցկացրեց: Մարտին տեղի կունենա աշխարհի չեմպիոնի հավակնորդների մրցաշարը, և կարող եմ ասել, որ Լևոնը այդ մրցաշարի հաղթողի կոչման իրական հավակնորդ է: Նշեմ, սակայն, որ հավակնորդների նախորդ մրցաշարերում Արոնյանին «քաշել է» նյարդային համակարգի թուլությունը:
Ինտրիգը հետևյալն է. կկարողանա՞ արդյոք Արոնյանը զսպել էմոցիաները և խաղալ այնպես, ինչպես խաղում է գերմրցաշարերում: Եթե նա գոնե խաղա իր հնարավորությունների սահմանում, կարծում եմ՝ կնվաճի հաղթողի կոչումը: Նշեմ նաև, որ այս տարի Արոնյանը աչքի ընկավ նաև կայուն խաղով»- ասել է շախմատայի փորձագետ, գրասմայստեր Սերգեյ Շիպովը:
Նշենք, որ հաղթելով Թբիլիսիում տեղի ունեցած աշխարհի գավաթի խաղարկությունում՝ Լևոն Արոնյանը պատմական արդյունք էր գրանցել: Մասնավորապես, մեր շախմատիստը միակն է աշխարհում, ում հաջողվել է դառնալ աշխարհի գավաթի խաղարկության կրկնակի գավաթակիր: Նշենք նաև, որ աշխարհի չեմպիոն Մագնուս Կարլսենին չի հաջողվել նվաճել աշխարհի գավաթը:
Ինչևէ, լոնդոնյան մրցաշարում ոչ այնքան հաջող ելույթի հետևանքով զգալի նվազել է Արոնյանի անհատական գործակիցը: 9 պարտիաներում ոչ մի հաղթանակ չտանելու հետևանքով հայ գրոսմայստերը կորցրել է 8.5 միավոր: Այս պահին 2796.5 գործակցով Արոնյանը միայն 4-րդն է: Երրորդ հորիզոնականում է Ադրբեջանի ներկայացուցիչ Շաքրիար Մամեդյարովը, որի անհատական գործակիցը 2799.0 է: Միանգամից 12.1-ով ավելացել է ԱՄՆ ներկայացուցիչ Ֆաբիանո Կարաունայի անատական գործակիցը: 2811.1 անհատական գործակցով Կարաունան այս պահին երկրորդ է: ՖԻԴԵ-ի դասակարգման աղյուսակը շարունակում է գլխավորել Մագնուս Կարլսենը, որի անհատական գործակիցը 2833.8 է:
Նշենք, որ Կարլսենի գործակիցը նվազել է 3.5-ով: ՖԻԴԵ-ի Գրան Պրիի 4-րդ փուլից հետո Լևոն Արոնյանը դասակարգման աղյուսակում երկրորդն էր: Լոնդոնյան մրցաշարում 9-րդ տուրից հետո Յան Նեպոմնյաշչին և Ֆաբիանո Կարուանան ունեին 6-ական միավոր և բաժանում էին 1-2-րդ հորիզոնականները: Հաղթողին որոշելու համար խաղարկվել են լրացուցիչ արագ շախմատի պարտիաներ, որտեղ Ֆաբիանո Կարուանան 2.5-1.5 հաշվով առավելության է հասել Նեպոմնյաշչու նկատմամբ և դարձել մրցաշարի հաղթող: Մագնուս Կարլսենը, Ուեսլի Սոն և Մաքսիմ Վաշիե-Լագրավը 5-ական միավորով կիսել են 3-5-րդ հորիզոնականները: Լրացուցիչ ցուցանիշների հաշվարկից հետո Կարլսենը գրավել է 3-րդ հորիզոնականը:
Նշենք նաև, որ London Chess Classic-ը Grand Chess Tour շարքի վերջին մրցաշարն էր: Ընդհանուր հաշվարկում Լևոն Արոնյանը Grand Chess Tour-ում զբաղեցրել է երրորդ հորիզոնականը և որպես պարգևատրություն կստանա 91 հազար ԱՄՆ դոլար: Երկրորդ տեղը գրավել է ֆրանսիացի Մաքսիմ Վաշյե-Լագրավը, որը կստանա 207 հազար դոլար: Հաղթող դարձած Մագնուս Կարլսենն էլ կպարգևատրի 245 հազար դոլարով: