Մոուրինյոն դժգոհ է, իսկ Մխիթարյանն իր վրա վերցրեց խաղը և…
13:16 | 2017-09-13
Չեմպիոնների լիգայի խաղարկությունը «Մանչեսթեր Յունայթեդը» սկսեց տպավորիչ հաղթանակով՝ սեփական հարկի տակ 3:0 հաշվով առավելության հասնելով Շվեյցարիայի չեմպիոն «Բազելի» նկատմամբ: Դաշտի տերերը մրցակցին գերազանցեցին խաղային բոլոր առումներով: Հանդիպման 19-րդ րոպեին վնասվածք ստանալով՝ խաղադաշտը լքեց «Յունայթեդի» առաջատարներից Պոլ Պոգբան: Նրա փոխարեն ասպարեզ դուրս եկավ Մարուան Ֆելաինին, ով դարձավ իր թիմի առաջին գոլի հեղինակը: Այս փոփոխությունը, կարծում ենք, բեկումնային նշանակություն ունեցավ:
Մասնավորապես, դաշտի կենտրոնական հատվածում խաղն իր վրա վերցրեց Հենրիխ Մխիթարյանը, ում շնորհիվ «Յունայթեդի» գրոհները զարգանում էին արագ և դինամիկ: Ի տարբերություն մի շարք հանդիպումների՝ երեկ Մխիթարյանը գործում էր ավելի համարձակ և չէր վախենում կորցնել գնդակը: Պոգբան գործելով կիսապաշտպանության կենտրոնում՝ չէր շտապում շուտ բաժանվել գնդակից, ինչի հետևանքով էլ փոխվում էր գրոհների բնույթը: Սլացիկ և արագ գրոհների փոխարեն՝ «Մանչեսթերի» ֆուտբոլիստները դիրքավորվում էին, ինչի հետևանով էլ մրցակիցը հասցնում էր փակել ազատ տարածությունները:
Հենրիխ Մխիթարյանի գլխավոր զենքերից էր դաշտում արագ տեղաշարժվելն ու արագ՝ կրատիվ որոշում կայացնելը: Նրա խաղային դինամիկան ստիպում էր գրոհին մասնակցող ֆուտբոլիստներին ավելի նպատակաուղղված գործել: Ակնհայտ է, որ հաղթանակի կայացման մեջ էական նշանակություն ունեցավ Մխիթարյանին ենթահարձակվողի դիրքում խաղացնելը:
Պոգբային փոխարինած Ֆելաինին, ում մասնակցությունը այս խաղին հարցականի տակ էր, ևս աչքի ընկավ գրագետ խաղով: Նա ազատ գործելու հնարավորություն տալով Մխիթարյանին՝ ավելի շատ զբաղված էր կիսապաշտպանության խորքում գրոհները մեկուսացնելով: Ֆելաինին հասցնում էր նաև մասնակցել գրոհներին՝ արդյունավետ գործելով հատկապես երկրորդ հարկում:
Խաղից հետո «Մանչեսթեր Յունայթեդի» գլխավոր մարզիչը դժգոհել է իր ֆուտբոլիստների գործողություններից՝ քննադատական խոսքեր հնչեցնելով նրանց հասցեին: «Այո, հյուրընկալելիս կարևոր 3 միավոր վաստակեցինք և ուրախացրինք երկրպագուներին: Մինչև 2:0-ն ցուցադրում էինք կայուն ու վստահ խաղ՝ վերահսկելով հանդիպման ընթացքը: Երբ խփեցինք երկրորդ գոլը, թիմը դադարեց խաղալ և թույլ էր տալիս բազմաթիվ սխալներ, ինչի հետևանքով կարող էինք լուրջ խնդիրներ ունենալ: Սկսեցինք խաղալ համակարգչային՝ PlayStation-ի ֆուտբոլ: Չեմ ընդունում, երբ ֆուտբոլիստները փորձում են կատարել անիմաստ հնարքներ՝ չհարգելով մրցակցին: Դա անընդունելի է: Ինձ ամենևին դուր չեկավ մեր վերաբերմունքը, քանի որ խաղացողները շուտ թուլացան:
Սա Չեմպիոնների լիգայի սկիզբն է: Պետք է լուրջ վերաբերվել գործին: «Ռեալի», «Բարսելոնայի» ու «Բավարիայի» պես թիմերի համար Չեմպիոնների լիգան կսկսվի միայն փետրվարին: Այս թիմերը խմբային փուլում միայն նախավարժանք են կատարում: Երբ փետրվարին Պրեմիեր լիգայում սկսվեն ամանորյա խենթությունները, այդ ակումբները թարմ կլինեն և պատրաստ պայքարի: Հիմա մեզ համար առաջնային խնդիրն է նվաճել փլեյ-օֆֆի ուղեգիր: Երբ անենք դա, կարող ենք վայելել լավագույն ակումբների դեմ խաղալու հնարավորությունը»,- ասել է Մոուրինյոն:
Իսկ թե որ ֆուտբոլիստների գործողություններից է պորտուգալացի մասնագետը դժգոհ՝ չի բարձրաձայնել:
«Բազելի» դեմ տպավորիչ հնարք կիրառեց նաև Մխիթարյանը՝ գնդակը փախցնելով մրցակցի ոտքերի միջով: Այս դրվագը դարձել է համացանցի այսօրվա հիթերից մեկը: Նշենք, որ ի տարբերություն նախորդ հանդիպումների՝ Մոուրինյոն չփոխարինեց Մխիթարյանին: Կարծում ենք՝ եթե «Յունայթեդի» գլխավոր մարզիչը դժգոհ լիներ մեր ֆուտբոլիստի գործողություններից, ապա Մխիթարյանը վերջնամասում կլքեր խաղադաշտը:
Մխիթարյանը իր բարձրության վրա էր մինչև հանդիպման վերջին վայրկյանը: Մոուրինյոն վստահում է նրան, և «Բազելի» հետ հանդիպումը ցույց տվեց, որ Հայաստանի ազգային հավաքականի ավագը «Յունայթեդի» առանցքային խաղացողներից է: Այս ենթախմբի մյուս խաղում Մոսկվայի ԲԿՄԱ-ն հյուրընկալվելիս 2:1 հաշվով առավելության է հասել «Բենֆիկայի» նկատմամբ:
Չեմպիոնների լիգայի խաղարկությունում «Մանչեսթեր Յունայթեդը» հաջորդ հանդիպումը կանցկացնի սեպտեմբերի 27-ին՝ Մոսկվայում մրցելով ԲԿՄԱ-ի հետ: