Սոցիալական ցանցերի ղրղզական տիրույթում հակահայկական տրամադրություններ գրգռած աղբյուրը բացարձակ ֆեյք է. Արա Սահակյան
23:27 | 2017-08-12
Սոցիալական ցանցերի ղրղզական տիրույթում հակահայկական տրամադրություններ գրգռող կայքը բացարձակ ֆեյք է: Այն հայկական աղբյուների հետ որևէ կապ չունի: Այս մասին «Արմենպրես»-ի հետ զրույցում նշել է Ղրղզական Հանրապետությունում Հայաստանի Հանրապետության դեսպան Արա Սահակյանը՝ մեկնաբանելով ղրղզական սոցցանցերում բուռն քննարկվող բացահայտ ֆեյք աղբյուրի` armenianreport.com-ի հոդվածն ու դրա արձագանքները:
«Ակնհայտ է, որ մենք այստեղ գործ ունենք ֆեյք կայքի հետ: Հակաղրղզական, վիրավորական շեշտադրումներով հոդվածով փորձ է արվում թեժացնել կրքերը: Ֆեյք աղբյուրների վրա հիմնվելով՝ ազգամիջյան թշնամանք հրահրելու գործելաոճն անընդունելի է»,-ասաց Արա Սահակյանն՝ հավելելով, որ դրա իրական ներգործությունը սթափ մտածող մարդկանց վրա զրոյական է: