Բասկետբոլի աշխարհի առաջնության նախընտրական փուլում Հայաստանի ազգային հավաքականն առաջին արտագնա հանդիպումն անցկացրեց: Մեր բասկետբոլիստները Սարաևոյում 98:85 հաշվով զիջեցին Բոսնիա Հերցեգովինային: Հայաստանի հավաքականը կարող էր չպարտվել, եթե չլինեին պարզագույն սխալներն ու վրիպումները տուգանային նետումներից: Ամեն դեպքում մեր հավաքականը արժանի խաղ ցուցադրեց: Որքան էլ տարօրինակ է, Բոսնիայի դեմ Հայաստանի հավաքականը ցույց տվեց ամենաարդյունավետ խաղն աշխարհի առաջնության ընտրական փուլում: Մասնավորապես, Սլովակիայի դեմ առաջին խաղում մեր հավաքականը վաստակել էր 75 միավոր, իսկ Շվեդիայի դեմ մրցավեճում՝ 82: Փաստորեն կայացած երեք խաղերում մեր հավաքականի մոտ արձանագրվել է արդյունավետության աճի դինամիկա: Բոսնիայի հավաքականի դեմ հատկապես հաջող էին մերոնց 3 միավորանոց նետումները: Եվ սա այն դեպքում, երբ վնասվածքի պատճառով հանդիպումը բաց թողեց Հայաստանի հավաքականի առաջատարներից Ալլան Հեսսը, ով 3 միավորանոց նետումների վարպետ է: Բոսնիա Հերցեգովինա-Հայաստան հանդիպման ամենաարդյունավետ խաղացողը մեր հավաքականի խաղարկող Ռայան Բոատռայթն է, ով վաստակել է 30 միավոր: Բոսնիա և Հերցեգովինայի ամենաարդյունավետ խաղացող Ջանան Մուսան վաստակել է 28 միավոր: «Խաղի մասին պետք է նշել երկու կարևոր հանգամանք: Նախ՝ մենք հարձակման ժամանակ 16 անգամ տիրել ենք օղակից անդրադարձած գնդակին: Մեծ ազդեցություն ունեցավ նաև այն, որ Թավաքալյանը և Մկրտիչյանը բավական արագ ստացան 3-ական խախտում: Կվերլուծենք մեր սխալները և հետևություններ կանենք: Այժմ մեզ շատ կարևոր խաղ է սպասվում Բրատիսլավայում, որտեղ հյուրընկալվելու ենք Սլովակիային»,- հետխաղյա մամուլի ասուլիսում ասել է Հայաստանի ազգային հավաքականի գլխավոր մարզիչ Նիկշա Բավցևիչը: Այս տուրում ենթախմբի ետնապահը՝ Սլովակիան, անակնկալ հաղթանակ է տարել՝ սեփական հարկի տակ 68:59 հաշվով առավելության հասնելով Շվեդիայի նկատմամբ: Այս պահին ենթախմբի առաջատարը Բոսնիա Հերցեգովինան է՝ 5 միավորով: Նույնքան միավոր ունի նաև երկրորդ հորիզոնականում գտնվող Հայաստանի հավաքականը: Շվեդիան և Սլովակիան 4-ական միավորով զբաղեցնում են համապատասխանաբար երրորդ և չորրորդ հորիզոնականները: Օգոստոսի 12-ին մեր հավաքականը Բրատիսլավայում մրցելու է Սլովակիայի հավաքականի հետ, և հաղթանակի դեպքում մեր հավաքականը լուրջ հայտ կներկայացնի աշխարհի առաջնության հիմնական ընտրական փուլի դուրս գալու: Բոսնիայի հավաքականն այս տուրում հյուրընկալելու է Շվեդիային, որին զիջել էր մեկնարկային խաղում: Բասկետբոլի մասնագետների կողմից նախընտրական А ենթախումբն արդեն իսկ ստացել է «մահվան խումբ» որակավորումը: Սլովակիան հաղթելով Շվեդիային, կարելի է ասել, խառնեց խաղաքարտերը: Բոսնիային հաղթելուց հետո թվում էր, թե սկանդինավյան հավաքականը ենթախմբի գլխավոր ֆավորիտն է: Երևանում շվեդների հետ հանդիպումից հետո բոլորը խոսեցին Հայաստանի հավաքականի ֆավորիտ դառնալու մասին: Թվում էր, թե Սլովակիայի հավաքականը լինելու է ենթախմբում միավորներ բաժանողի դերում, բայց հիմա այս հավաքականը ևս իրական հնարավորություն ունի ընտրական հաջորդ փուլ դուրս գալու: Սլովակիա-Հայաստան հանդիպումը խոստանում է չափազանց լարված պայքար: Մեր հավաքականն արդեն իսկ մրցել է ենթախմբի բոլոր հավաքականների հետ: Ամփոփելով ընտրական փուլի առաջին կեսը՝ կարող ենք ասել, որ Հայաստանի հավաքականը, որը այս մրցաշարի իրական հայտնությունն է, ապացուցեց, որ կարող է և արժանի է խաղալու աշխարհի առաջնության հիմնական ընտրական փուլում, որին մասնակցում են Եվրոպայի ուժեղագույն հավաքականները: Բրատիսլավայից մեր հավաքականն ուղևորվելու է Շվեդիա, որտեղ օգոստոսի 16-ին կմրցի Շվեդիայի ընտրանու հետ: Վերջին հանդիպումը Հայաստանի հավաքականը կանցկացնի օգոստոսի 19-ին, Երևանում՝ մրցելով Բոսնիայի հետ: Վերջինի հետ երեկ կայացած խաղում ընտրական այս փուլում իր նորամուտը նշեց Ալբերտ Թադևոսյանը, ով լավ տպավորություն թողեց: Երևանում կայացած հանդիպումը Թադևոսյանը բաց էր թողել վնասվածքի պատճառով: Սլովակիայի հետ հանդիպմանը ամենայն հավանականությամբ կմասնակցի նաև Ալլան Հեսսը: