Սյունիքի մարզպետ Վահե Հակոբյանը Ազգային ժողովի ընտրությունների ժամանակ Գորիսի հարակից Ներքին Խնձորեսկ համայնքում սոցիալապես անապահով, դոմիկում ապրող կնոջը խոստացել է ձայն բերելու դիմաց բնակարան գնել, սակայն մինչ օրս մարզպետը խոստումը չի կատարել: «Ես անապահով ընտանիք եմ, ունեմ 4 անչափահաս երեխա: Ապրում եմ դոմիկում՝ փայտից տնակում: Ընտրությունների ժամանակ Վահե Հակոբյանը մեզ խոստացավ տուն գնել, սակայն մինչ օրս խոստումը չի կատարել: Մարզպետն անձամբ խոստացավ, որ եթե շատ ձայն հավաքեմ, 10 հազար դոլարի սահմաններում գյուղում տունը կառնի: Հետո ասեց՝ 10 հազարը թանկ է, 5 հազարի սահմաններում կառնեմ: Պայմանավորվեցինք: Ես 40 ձայն հավաքեցի, սրան-նրան խնդրեցի, չէին համաձայնում, բոլորը փող էին ուզում ձայնի դիմաց: Բայց 40 ձայն հավաքեցի, 70-80 հազար դրամ փող ծախսեցի տրանսպորտի վրա, գնացի-եկա, բարեկամներիս համոզեցի, ձայները հավաքեցի, տարա, ներկայացրեցի, բայց նա խոստումը չկատարեց»,- «Առաջին լրատվական»-ի հետ զրույցում ասաց Լուսինե Սարգսյանը: Լուսինեն խորհրդարանական ընտրություններից հետո փորձել է ամեն կերպ կապվել մարզպետի հետ, պահանջել-խնդրել, որպեսզի խոստումը կատարի, բայց չի ստացվում: «Գորիսում նա օգնական ունի: Զանգահարում եմ իրեն՝ մեկ ասում է, որ մարզպետը արտասահմանում է, մեկ՝ գործերով խառն է: Ոչ մի կերպ չի ստացվում նրան գտնել: Ստացվում է, որ ես իրենց համար ձայներ ապահովեցի, բայց իրենք ինձ 10 դրամի օգուտ չտվեցին»,- ասաց կինը: Մեր դիտարկմանը, թե չի՞ կարծում, որ իր արածը այնքան էլ օրինական չէ, և մարզպետի հետ նախընտրական շրջանում ձայների փոխարեն բնակարան ուզելու փոխարեն կարելի էր այլ ճանապարհով հասնել խնդրի լուծման, մանավանդ, որ սոցիալապես անապահով են և հատուկ կարգավիճակ ունեն, տիկինը պատասխանեց. «Գիտեք, ես 4 անչափահաս երեխա ունեմ, ամեն օր հիվանդանոցներում եմ: Տան պայմաններից երեխաներս թոքաբորբով հիվանդ են: Հենց հիմա էլ ես եմ բուժվում հիվանդանոցում թոքաբորբից: Ամռանը շատ տաք է, օձեր են մտնում ներս, իսկ ձմռանը՝ ահավոր ցուրտ: Ամուսինս ապրիլյան պատերազմի մասնակից է: Ի վիճակի չէ աշխատել: Ես ուրիշ ինչ կարող եմ անել»,- ասաց Լուսինեն: Ի դեպ, մարզպետ Վահե Հակոբյանը տիկնոջը միայն բնակարան չի խոստացել: Խոստացել է նաև նրա նպաստի հարցը լուծել, սակայն այդ խոստումն էլ չի կատարել: «Նախընտրական այդ հանդիպման ժամանակ դահլիճում լիքը մարդ կար՝ գյուղապետեր, բնակիչներ: Բոլորի ներկայությամբ Վահե Հակոբյանն ասաց՝ մի մտածեք, ես խոստանում եմ, որ համ ձեր բնակարանի հարցը կլուծեմ, համ միանվագ նպաստի: Ասաց, որ ամեն ինչ կանի, որ իմ երեխաները ապահով ապրեն: Բայց մինչ օրս ոչ տունը կա, ոչ էլ նպաստը: Ասեցի՝ լավ, տունը չեք առնում, գոնե նպաստիս հարցը լուծեք, էդ մի քանի կոպեկը ստանամ, բայց դա էլ չարեցին: Գորիսի քաղաքապետարանից 20 հազար դրամով օգնեցին, բերեցինք դոմիկի պատալոկը ամրացրեցինք, որ օձերը տուն չմտնեն, որ երեխեքս չվախենան»,- ասաց Լուսինեն: Նա կատարվածի մասին նամակ է գրել, կցել դոմիկի լուսանկարները և ուղարկել վարչապետ Կարեն Կարապետյանին, սակայն ինչպես մարզպետ Վահե Հակոբյանը, այնպես էլ վարչապետ Կարեն Կարապետյանը որևէ կերպ չեն պատասխանել, չեն արձագանքել տիկնոջ նամակներին ու զանգերին: Մեզ նույնպես չհաջողվեց կապվել մարզպետ Վահե Հակոբյանի հետ՝ պարզելու, թե ինչու չի կատարում իր «նախընտրական խոստումը»: Մեր բոլոր զանգերը անպատասխան մնացին: