Ծիրանի մթերման գործընթացը բնավ էլ հարթ չի ընթանում, հակառակ պատկան մարմինների հավաստիացումների: Այսօր Արարատի մարզի մի քանի համայնքներում միջադեպեր են գրանցվել մթերողների ու  գյուղացիների միջև: Գյուղացիների խոսքերով՝ մթերողները չնախատեսվածից էժան գին են առաջարկում ծիրանի համար, որն այս սեզոնի համար աննախադեպ է: «Էսպես ոնց կլինի, մեքենան մտցրել է այգիս, ասում է՝ 400-500 դրամով տուր: Բայց ես ոնց ընտիր բերքս էդ գնով քցեմ ջուրը: Շուկայում գնում էս, տեսնում՝ էդ ընտիր ծիրանը 1500-ից պակաս չկա: Մեզ հիմարի տեղ են դրել»,- «Առաջին լրատվական»-ի հետ զրույցում դժգոհեցին գյուղացիները: Նրանց խոսքերով՝ անցած տարի այսպես չէր: Հենց առաջին՝ ընտիր բերքը իրենք միշտ բարձր գնով են հանձնել և գոհ են մնացել: «Սաղ տարին չարչարվում ենք էս բերքի համար: Սաղ տարին Աստծո հետ կռիվ ենք տալիս, որ կարկուտ չգա, եղանակը չփչանա, որ էս օրվա օրով մի երկու կոպեկ աշխատենք, ոչ թե մեր բերքը թափենք ջուրը»,- հավելեցին գյուղացիները: Ի դեպ, այսօր մամուլը գրել էր, որ Արարատի մարզի Ջրաշեն գյուղի բնակիչները փակել են գյուղից դուրս եկող ճանապարհները և թույլ չեն տալիս, որպեսզի ծիրանով բեռնված բեռնատարները դուրս գան գյուղից, քանի որ ծիրան արտահանող գործարարները խաբել են գյուղացիներին ու այսօր կտրուկ իջեցրել են ծիրանի մթերման գինը՝ այն դարձնելով 400 դրամ 1 կգ-ի դիմաց: Գյուղացիները պահանջում են, որ գործարարները ծիրանը մթերեն նախօրոք պայմանավորված գնով: Ըստ տեղեկությունների՝ վիճաբանությունը վերաճել է ծեծկռտուքի: Ջրաշեն գյուղի գյուղապետ Արտյոմ Ղազարյանն «Առաջին լրատվական»-ի հետ զրույցում ասաց, որ վիճաբանություն չի եղել: Դա չափազանցված է: «Ոչ մի վիճաբանություն, առավել ևս ծեծկռտուք չի եղել: Առավոտյան մի քանի գյուղացի հավաքվել են իրար գլխի, բայց հետո համաձայնության են եկել: Հիմա մթերման գործընթացը նորմալ ընթանում է, մեքենաները կանգնած են, բերքահավաք է կատարվում»,- ասաց գյուղապետը, հավելելով, որ ներկայումս կիլոգրամը 500-600 դրամով մթերում է իրականացվում:   Լուսանկարը՝  shamshyan.com-ի