«Ես չեմ ցանկանում նորից մասնակցել ռեկտորի մրցույթին և չեմ ցանկանում խոսել դրա պատճառների մասին: Եկեք դա թողնենք առանց մեկնաբանության»,- «Առաջին լրատվական»-ի հետ զրույցում ասաց Բրյուսովի անվան լեզվաբանական համալսարանի ռեկտոր Գայանե Գասպարյանը՝ անդրադառնալով բուհի ռեկտորի փոփոխությանը: Ինչպես հայտնի է՝ կրթության և գիտության փոխնախարար Կարինե Հարությունյանը շուտով կտեղափոխվի Վալերի Բրյուսովի անվան պետական լեզվաբանական համալսարան՝ որպես ռեկտորի պաշտոնակատար, որից հետո նոր ռեկտորի պաշտոնի համար մրցույթ կհայտարարվի: Բրյուսովի գործող ռեկտոր Գայանե Գասպարյանի պաշտոնավարման ժամկետը լրացել է: Գայանե Գասպարյանը, սակայն, ասաց որ ինքը բուհը չի թողնելու, մնալու է բուհում: «Ես ոնց կարող եմ բուհը թողնել: Սա իմ տունն է, որտեղից չեմ կարող հեռանալ: Ես մնում եմ բուհում, ես այստեղ դասավանդելու եմ, բացի այդ, կենտրոն եմ ղեկավարելու»,- ասաց Գասպարյանը: Անդրադառնալով Կարինե Հարությունյանի թեկնածությանը, Գասպարյանն ասաց, որ նորմալ թեկնածու է, նա լավագույնս կկարողանա ղեկավարել բուհը, քանի որ կրթության ոլորտը շատ լավ ճանաչում է: «Նա կրթության փոխնախարար է, կրթության ոլորտը շատ լավ գիտի և բնականաբար, նա պետք է շատ լավ ղեկավարի բուհը, ավելի ճիշտ՝ ցանկացած բուհ, քանի որ իր ոլորտը հենց բարձրագույն կրթությունն է: Դրա համար որևէ խնդիր չեմ տեսնում»,- նկատեց Գասպարյանը: Մեր դիտարկմանը, թե խնդիրներ են առաջացել, որ այլևս չի ցանկանում ղեկավարել Բրյուսովը, տիկին Գասպարյանն արձագանքեց. «Առանց մեկնաբանության: Խնդրում եմ այլևս հարցեր չտալ այս թեմայով»,- եզրափակեց նա: Նշենք, որ ըստ մամուլի հրապարակումների՝ ԿԳ փոխնախարար Կարինե Հարությունյանին նախարարությունում փոխարինելու է ԱԺ նախկին ՀՀԿ-ական պատգամավոր Վահրամ Մկրտչյանը, որը «Բարեպաշտ սերունդ» հիմնադրամի ղեկավարն է։