Աշխարհի առաջնության ընտրական փուլի Մոնտենեգրո-Հայաստան հանդիպմանը մեր հավաքականին աջակցելու են մեկնել երկրպագուների «Առաջին հայկական ճակատի», ՖԱՖ շարժման ներկայացուցիչները: Կարևորագույն հանդիպումից առաջ մրցավայրում տիրող վիճակի և առաջիկա հանդիպման մասին «Առաջին լրատվական»-ը զրուցեց ՖԱՖ-ի հիմնադիր անդամ Սերգեյ Ջանջոյանի հետ: - Ինչպիսի՞ն է իրավիճակը Պոդգորիցայում Մոնտենեգրո-Հայաստան հանդիպումից ժամեր առաջ: - Այս պահին գտնվում ենք Պոդգորիցայից 50 կմ հեռավորության վրա: Այստեղ ամեն ինչ համեմատաբար հանգիստ է: Մի քանի ժամից կմեկնենք մայրաքաղաք տոմս ձեռք բերելու և մոբիլիզացվելու նպատակով: Նշեմ, որ երեկ խնդիր եղավ տեղի ոստիկանների հետ: Նրանք թույլ չտվեցին առանձին խմբերով և Հայաստանի հավաքականի շապիկներով քայլել՝ պնդելով, որ անվտանգության հետ կապված խնդիր են լուծում: Հուսով եմ՝ այսօր տհաճ միջադեպեր չեն լինի, քանզի տարբեր երկրներից խմբերով հայ երկրպագուներ են ժամանելու: - Ինչո՞վ կբացատրեք տեղի ոստիկանների նման վերաբերմունքը հայ երկրպագուների նկատմամբ: - Կարծում եմ՝ նման վերաբերմունքը նորմալ է: Նրանք ավելի լավ գիտեն իրենց երկրպագուներին: Անվտանգության նկատառումներով նրանք անընդհատ մեզ հետ են: Երեկ ուղեկցեցին քաղաքից քաղաք, և այսօր էլ հայ երկրպագուները կլինեն ոստիկանների ուժեղ հսկողության ներքո: - Որքա՞ն հայ երկրպագու ներկա կլինի «Գրադսկի» մարզադաշում: - Իմ հաշվարկով՝ մարզադաշտում ներկա կլինեն 100-150 հայ երկրպագուներ, ինչը նորմալ թիվ է: Ակտիվ երկրպագող զանգվածը կկազմի 50-70 մարդ: Ամեն դեպքում հուսով եմ, որ մեր ձայնը լսելի կլինի: Մարզադաշտ ենք գնալու մեր պաստառներով և թմբուկներով: - Բալկանյան երկրների երկրպագուները հայտնի են իրենց ագրեսիվ պահվածքով: Ինչպե՞ս են նրանք տրամադրված Հայաստանի հետ խաղին: - Շատ բան չեմ կարող ասել նրանց տրամադրվածության մասին: Նրանց հետո որևէ առնչություն դեռ չենք ունեցել: Գիտեմ, որ գլխավոր ֆան-ակումբն է «Վարվարին», որը աջակցում է Մոնտենեգրոյի գլխավոր թիմին և ազգային հավաքականին: Այս ակումբն ունի մի քանի տասնյակ տարվա պատմություն: Նրանք նույն սերբերն են, մի քանի տարի է, ինչ անջատվել են Սերբիայից: Հուսով եմ, որ նրանց հետ անախորժություններ չեն լինի: - Ձեր կանխատեսումը Մոնտենեգրո-Հայաստան հանդիպման վերաբերյալ: - Շատ հազվադեպ երևույթ է: Մեր խմբի բոլոր անդամների մոտ այնպիսի տրամադրություն է, որ անպայման հաղթելու ենք: Վերջին տարիներին հավաքականի հետ արտերկիր ենք մեկնել և ուրախացել նույնիսկ ոչ-ոքիի համար: Հիմա իրավիճակը փոխվել է, բոլորս հաղթանակ ենք ակնկալում, և կարծում եմ՝ այն իրատեսական է: - Ըստ Ձեզ՝ ի՞նչ հաշվով կավարտվի Մոնտենեգրո-Հայաստան հանդիպումը: - Հաշիվ կանխատեսել չեմ սիրում, քանզի գուշակություններս չեն իրականանում: Ցանկացած հաշվով հաղթանակը մեզ կբավարարի՝ լինի դա 1:0, թե 5:0: Իրականում խմբում տեղը բարելավելու համար անհրաժեշտ է շատ գոլեր խփել: Սակայն խաղն այնպիսի մեծ նշանակություն ունի, որ ցանկացած հաղթանակ գոհացնող կլինի: