ՀՀ ԱԺ նախկին պատգամավոր, Գագիկ Ծառուկյանի խնամի Մուրադ Գուլոյանը սնանկ է ճանաչվել: «Ամերիաբանկը» վարկային պարտավորությունները չկատարելուց հետո դիմել է դատարան Գուլոյանին սնանկ ճանաչելու պահանջով: Դատարանը բավարարել է բանկի պահանջը, սակայն Գուլոյանը ներկայումս դատարանում վիճարկում է առաջին ատյանի դատարանի՝ իրեն սնանկ ճանաչելու վերաբերյալ դատական ակտը: Մուրադ Գուլոյանը «Առաջին լրատվական»-ի հետ զրույցում ասաց, որ խոսքը ամբողջությամբ սնանկ ճանաչվելու մասին չէ: Իրենց պատկանող շինարարության բիզնեսով զբաղվող մի ընկերություն է միայն սնանկ ճանաչվել: Այն էլ, Գուլոյանի խոսքով, ինքը դրա հետ առնչություն չունի, միայն բանկից վարկը վերցնելիս ինքը ընդամենը երաշխավոր է կանգնել: «Մեր կամպանիաներից մեկն է վարկ վերցրել, ես երաշխավոր եմ կանգնել, ու սենց խնդիր է առաջացել: Հիմա դատական պրոցես է գնում, մենք դատարանում բողոքարկել ենք առաջին ատյանի որոշումը: Սպասենք տեսնենք՝ ինչ կլինի»,- ասաց Գուլոյանը՝ հավելելով, որ դատական պրոցեսից զատ, իրենք հիմա ընկերության առողջացման ծրագիր են ներկայացրել և վստահ են, որ կկարողանան ոտքի կանգնեցնել ընկերությունը: «Առողջացման ծրագիրն արդեն ներկայացրել ենք, քննարկում ենք, ամեն բան լավ կլինի: Բա պետք է ոտքի հանենք, առողջացնենք կամպանիան, հո չենք թողնի տենց սնանկ՝ խայտառակ լինենք»,- ասաց նախկին պատգամավորը: Գուլոյանն ասաց, որ տեղյակ չէ, թե ինչքան գումար են պարտք բանկին. «Ես տեղյակ չեմ, մանրամասներին չեմ տիրապետում: Եթե տեղյակ լինեի, թույլ չէի տա, որ բանը սրան հասներ: Ես մերոնց համար ընդամենը երաշխավոր եմ կանգնել ու չեմ հետևել: Որ հետևեի, սենց չէր լինի»,- ասաց Գուլոյանը: Գուլոյանից հետաքրքրվեցինք՝ հնարավո՞ր է որ այլևս պատգամավոր չէ, բիզնեսը պաշտպանված չէ, դրա համար էլ հասել է սնանկության դուռը: «Նախ՝ էդ ես չեմ ցանկացել պատգամավոր դառնալ: Եվ հետո՝ մեր գործերը շատ լավ են, բիզնեսը հրաշալի վիճակում է: Մի կամպանիա է սնանկ ճանաչվել, էն էլ խնդիրը կլուծվի, առողջացման ծրագիր կներկայացնենք: Ամեն ինչ կարգին է: Գուլոյանը չի սնանկացել»,- ծիծաղելով եզրափակեց Ծառուկյանի խնամին: Նշենք, որ Գուլոյանները զբաղվում են բիզնեսով, որոնցից մի մասը՝ նախկին վարչապետ Հովիկ Աբրահամյանի որդու՝ Արգամ Աբրահամյանի հետ: Պատգամավոր եղած ժամանակ՝ 2013թ., Մուրադ Գուլոյանը ընկերություններից մեկում 287.595.000 դրամով ձեռք է բերել բաժնեմաս: Իսկ իր հաշվին առկա դրամական միջոցները կազմել են 270 միլիոն դրամ և 1 մլն 250 հազար դոլար: 2012թ. փետրվարից Մուրադ Գուլոյանին է պատկանում «Շիրակ» թռչնաբուծական ֆաբրիկա ՍՊԸ-ի 100% բաժնեմասը: Մուրադ Գուլոյանը 50/50 բիզնես ունի մեկ այլ նախկին պատգամավորի՝ Մելիք Մանուկյանի (Շշի Մելո) հետ: Նրանց է պատկանում 2012թ. վերջին հիմնադրված «ՍԱՐՊԵՏ» ՍՊԸ-ն: Ըստ հարկային մարմնի՝ «ՍԱՐՊԵՏ» ՍՊԸ-ն զբաղվում է կառուցապատման նախապատրաստական աշխատանքներով: Ընկերության տնօրենը Մուրադ Գուլոյանի եղբայր Վահագն Գուլոյանն է: