Ընտրական համակարգը դրսից բերելով՝ չապահովեցինք ազգային ոգին բարձրացնելու պարտադիր պայմանը
10:45 | 2017-05-21
Ընտրությունների համակարգը դրսից բերելով՝ չապահովեցինք պարտադիր պայմանը՝ ազգային ոգին բարձրացնել ու համապատասխանեցնել ներմուծված օրենքներին: Եթե դա չի արվում, ապա ընտրություններով իշխանություն փոխելը դառնում է անհնարին, և ընտրությունները ժողովրդին վհատեցնում են, երկիրը քաոսի վերածում
«Առաջին լրատվական»-ը հրապարակախոս Արծրուն Պեպանյանից, թե ինչպես է գնահատում հետընտրական ցիկլը, կա՞ արդյոք սպասելիք այս նոր խորհրդարանից: Ի պատասխան Արծրուն Պեպանյանը նշեց.
«Դեռ անցյալ դարի վերջերից հրապարակայնորեն (հարցազրույցներ, հոդվածներ, սեմինարներ-քննարկումներ, հաղորդաշարեր, գրքեր) հիմնավորում եմ, որ մենք ընտրությունների համակարգը դրսից բերելով՝ չապահովեցինք պարտադիր պայմանը՝ ազգային ոգին բարձրացնել ու համապատասխանեցնել ներմուծված օրենքներին: Եթե դա չի արվում, ապա ընտրություններով իշխանություն փոխելը դառնում է անհնարին, և ընտրությունները ժողովրդին վհատեցնում են, երկիրը քաոսի վերածում:
Բացի դա, մեկ տասնամյակ է՝ հրապարակայնորեն (հարցազրույցներ, հոդվածներ, սեմինարներ, հաղորդաշարեր, գրքեր) ներկայացնում եմ իրավիճակից դուրս գալու՝ մեր մեծերի ուրվագծած, իմ կողմից լրամշակված ուղին, որը հաշվի է առնում իրավիճակը ծնող երևույթների արդյունարար բացասական ազդեցությունը; Այդ ուրվագիծը թերևս ելքի միակ ուղին է, ինչում է՛լ ավելի եմ համոզվում ժամանակի ընթացքում: Գտնում եմ, որ ներդրված ջանքերս բավարար են հանրային իրազեկում ապահովելու համար, ու այսուհետ այդ հարցերին հրապարակային իմ ելույթներում չեմ անդրադառնա: Ելքի ուրվագծի վերաբերյալ ելույթներս կան համացանցում: Պատրաստ եմ պարզաբանել ընթերցողների հարցերը, պատրաստ եմ հաշվի նստել առաջարկությունների հետ, պատրաստ եմ քննարկել առարկություններն ու դիտողությունները: Մնացյալ հարցերով զբաղվելը՝ ընտրություններ, կուսակցություններ, ընդդիմություն, իշխանություն, համարում եմ ժամանակի անտեղի կորուստ»: