Հայերն ունեն Մխիթարյան, բարձրակարգ մասնագետներ. Իսկ ինչո՞վ ենք մենք մտածում… Հայացք Ադրբեջանից
14:39 | 2017-04-04
Ադրբեջանցի ֆուտբոլային բլոգեր Էրքին Իբրահիմովը, վերլուծելով 2018 թվականի աշխարհի առաջնության ընտրական փուլի մրցաշարային իրավիճակը, համեմատական է անցկացրել իր և նախկին ԽՍՀՄ-ի անդամ երկրների ազգային թիմերի միջև:
Անդրադառնալով Հայաստանին՝ բլոգերը, կարելի է ասել, օբյեկտիվորեն է ներկայացրել երկու երկրների հավաքականների ուժեղ և թույլ կողմերը: «Հայերը թիմային ֆուտբոլ են խաղում: Դա նրանց գլխավոր առավելությունն է: Վերջին տարիներին Հայաստանի ազգային հավաքականը գլխավորում են տեղացի մարզիչներ: Հարևան երկրում շատ են բարձրակարգ, հեռանկարային մասնագետները: Մենք միլիոնները ջուրն ենք գցում Բերտի Ֆոգստերին աշխատավարձ տալով: Ինչո՞վ ենք մենք մտածում: Բացի Գուրբան Գուրբանովից, մենք չունենք նորմալ մասնագետ: Չունենք մասնագետ, ով կարող է գլխավորել Ադրբեջանի ազգային հավաքականը: Կարծում եմ՝ առաջիկայում չենք էլ ունենա նորմալ մասնագետ, քանզի Ադրբեջանի ֆուտբոլի ֆեդերացիայում մարզիչներին լիցենզիա են հանձնում անտաղանդ Բերնհարդ Լիպերտը և նրա թարգմանիչը»,- նշել է Իբրահիմովը:
Նրա կարծիքով՝ Հայաստանի հավաքականում կան թերևս մի քանի ֆուտբոլիստներ, ովքեր խաղամակարդակով զիջում են Ադրբեջանի հավաքականում հանդես եկող ֆուտբոլիստներին. «Հայերն ունեն Մխիթարյան: Այստեղ ամեն ինչ պարզ է և ակնհայտ: Բայց, օրինակ, «Ալաշկերտի» 23-ամյա դարպասապահ Արսեն Բեգլարյանը կայուն խաղ չի ցուցադրում: Կարծում եմ՝ մեր Քյամրան Աղաևսը խաղամակարդակով և փորձով գերազանցում է նրան: Ռուսաստանում ծնված հարձակվող Ռուսլան Կորյանը ևս աչքի չի ընկնում տպավորիչ խաղով: Շեյդեևն ու Իլմազը Կորյանից ավելի ուժեղ են: Մեր հավաքականից կարող եմ առանձնացնել նաև պաշտպաններ Ռաշադ Սադիգովին և Բադվի Հուսեյնովին, ովքեր վատ չեն խաղում: Հայաստանի հավաքականի կենտրոնական պաշտպանները երիտասարդ են և աճելու տեղ ունեն: Նրանք հանդես են գալիս Իրանում և արտասահմանյան այլ ակումբներում»:
Նշենք, որ Հայաստանի ազգային հավաքականում իսկապես խնդրահարույց է դարպասապահի, ինչպես նաև կենտրոնական հարձակվողի հարցը: Այնուամենայնիվ, պնդել, որ նրանք խաղամակարդակով զիջում են վերը թվարկած ադրբեջանցի ֆուտբոլիստներին՝ ճիշտ չի լինի: Ադրբեջանցի վերլուծաբանի կարծիքով՝ մարտի 26-ին Հայաստանի հավաքականի մրցակից Ղազախստանը կործանման ճանապարհին է: Մասնավորապես, Իբրահիմովը մատնանշում է, որ Ղազախստանում ազգային թիմը ուժեղացնելու նպատակով քաղաքացիություն է տրվում Ռուսաստանի առաջին դիվիզիոնում հանդես եկող «քրջոտ» խաղացողներին:
«Ղազախները ազգային հավաքականը վստահեցին Բորոդյուկին, ով ուղղակի քանդեց «Կայրաթը»: Ինչո՞ւ: Այս որոշումը դժվար է տրամաբանել: Ղազախստանի հավաքականի մեծ մասը Ռուսաստանի առաջին դիվիզիոնից բերված խոտանն է: Ֆուտբոլը Ղազախստանում անդունդի եզրին է: Թե Բարադյուկը և թե ազգությամբ ռուս թույլ ֆուտբոլիստները վերջնականապես կտապալվեն առաջիկա հանդիպումներում»,- նկատել է Իբրահիմովը:
Վերջինս խիստ քննադատորեն է վերաբերվում նաև մոլդովացիների որդեգրած ֆուտբոլային քաղաքականությանը: Բլոգերի կարծիքով՝ Մոլդովայի ֆուտբոլի ֆեդերացիային պետք է մրցանակ շնորհել ամենահիմար մարզիչներ նշանակելու անվանակարգում: Նման մոտեցման հետևանքով, ըստ Իբրահիմովի, Մոլդովան այսօր դասվում է Եվրոպայի ամենաթույլ հավաքականների շարքում:
Չնայած ընտրական փուլում Վրաստանը խիստ անհաջող է հանդես գալիս, Իբրահիմովը կարծում է, որ այս հավաքականը վատ որակի ֆուտբոլ չի ցուցադրում. «Վրացիները այսօր չունեն Կալաձեի կամ Արվելաձեի պես ֆուտբոլիստներ: Բայց այս հավաքականում խաղում է Հոլանդիայի բարձրագույն դիվիզիոնը ներկայացնող Գուար Քաշիան: Ժամանակ առ ժամանակ Իտալիայի բարձրագույն լիգայում աչքի է ընկնում Լևան Մչեդլիձեն: Վրացիներն ունեն բարձրակարգ խաղացողներ նաև Ռուսաստանի Պրեմիեր լիգայում: Չնայած Վրաստանը Թբիլիսիում ոչ-ոքի՝ 1:1 խաղաց Մոլդովայի հետ և զիջեց Սերբիային, այդուհանդերձ՝ խաղի որակը նորմալ էր: Մինչ այդ վրացիները ոչ-ոքի էին խաղացել Ուելսի հետ և մեկ գնդակի տարբերությամբ պարտվել Իռլանդիային: Այս հավաքականում ինչ-որ բան չի ստացվում, բայց դա լուծելի խնդիր է»:
Իբրահիմովի կարծիքով՝ բացի Հայաստանից, նախկին ԽՍՀՄ երկրների հավաքականներից կարելի է գովեստի խոսքեր հնչեցնել նաև Էստոնիային: Ամենաթույլ և անդեմ ֆուտբոլ ցուցադրող հավաքականն էլ Բելառուսն է: Վերջինս մարտի 25-ին ընտրական խաղում 4:0 հաշվով պարտվել է Շվեդիային, իսկ չորս օր անց 3:0 հաշվով՝ Մակեդոնիային: