«Բոլորս էլ մեղքի զգացում ունեինք… հոգեվարքի մեջ էինք». կուրսանտի դաժան սպանության գործով վկայի ցուցմունքը

«Բոլորս էլ մեղքի զգացում ունեինք… հոգեվարքի մեջ էինք». կուրսանտի դաժան սպանության գործով վկայի ցուցմունքը

Ավան և Նոր Նորք վարչական շրջանների ընդհանուր իրավասության դատարանում Դավիթ Հարությունյանի նախագահությամբ շարունակվեց Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատական նիստը: Հիշեցնենք՝ կուրսանտներ Գնել Թևոսյանին, Նորիկ Սահակյանին, Վաչե Սահակյանին ու Մովսես Ազարյանին մեղադրանք է առաջադրված այն բանի համար, որ 2015 թվականի հունվարի 29-ի գիշերը՝ ժամը 2-ից 3-ի սահմաններում, գումարտակի թիվ 408 ննջարանում առանձին դաժանությամբ, խուլիգանական դրդումներով սպանել են կուրսանտ Հայկազ Բարսեղյանին: Սպանությունից հետո տուժողի մարմինը կախվել է մարզահրապարակի պտտաձողից՝ ինքնասպանության տպավորություն ստեղծելու համար... Արգելանքի տակ չգտնվող հինգերորդ ամբաստանյալը՝ Վարազդատ Սաֆարյանը, ով սպանության դրվագով չի մեղադրվում,  մեղադրվում է Վաչե Սահակյանի, Մովսես Ազարյանի հետ միասին ԶՈւ ներքին ծառայության կանոնագրքի կանոնները խախտելու, տարբեր դրվագներով կուրսանտներ Տիգրան Մանասերյանին ու Արտուշ Սիմոնյանին ծեծի ենթարկելու համար: Կուրսանտ Հայկազ Բարսեղյանի սպանության համար մեղադրվող չորս ամբաստանյալներից երկուսը՝ Վաչե Սահակյանն ու Մովսես Ազարյանը մեղադրվում են նաև տուժող Հարություն Ալեքսանյանի նկատմամբ բռնություն գործադրելու, նրան ծեծելու համար: Դատարանը դեռևս վկաների հարցաքննության փուլում է: Հարցաքննվեց վկա, երրորդ կուրսի կուրսանտ Հարություն Բալդրյանը: Նա մեկն է եղել այն կուրսանտներից, ովքեր դեպքի օրը՝ 2015 թվականի հունվարի 28-ին, «քուն» հրամանից հետո՝ ժամը 23-ի սահմաններում մարտկոցի պահեստասենյակում՝ «կապտյորկայում», հացկերույթ է արել՝ Վաչե Սահակյանի անցած ծննդյան օրը շնորհավորելու համար: Ըստ վկա Բալդրյանի՝ նրա ներկայությամբ ամբաստանյալներից հացկերույթին ներկա են եղել Վաչե Սահակյանը, Մովսես Ազարյանը և Վարազդատ Սաֆարյանը: Վկայի մասնակցությամբ՝ հացկերույթին ներկա են եղել յոթ կուրսանտներ: Գնել Թևոսյանին ու Նորիկ Սահակյանին վկան «կապտյորկայում» չի տեսել: Վկայի ննջասենյակը եղել է երկրորդ հարկում, նա «քուն» հրամանից հետո բոլորի հետ անկողին է մտել, բայց, քանի որ հացկերույթի վերաբերյալ արդեն պայմանավորվածություն ուներ իրեն մտերիմ կուրսանտների հետ, ժամը 23-ից 23-ն անց 30-ի սահմաններում գնացել է երրորդ հարկում գտնվող «կապտյորկա»: Ուտելիքը հիմնականում ուղարկել էր կուրսանտ Վահանյանի տատիկը՝ թթու, կարտոֆիլ, հաց, պահածոյացված կարմիր տաքդեղ: Ըստ վկայի՝ ինքը օղու փող է տվել Վահանյանին՝ 1100 դրամ, ու հացկերույթի սեղանին առկա է եղել 1 հատ 750 գրամանոց օղի: Ըստ վկայի՝ յուրաքանչյուրը մոտ երկու բաժակ օղի է խմել: Կոնկրետ ինքը այդքան է խմել, մյուսների մասին հաստատ չի կարող ասել, բայց շիշը վերջում դատարկվել է: Հացկերույթն ավարտել են կեսգիշերից մոտ կես ժամ  անց: Վկան նշեց, որ իր՝ «կապտյորկայում» գտնված ժամանակ այնտեղ մարդ չի մտել, մարդ դուրս չի եկել: Երկու անգամ թակել են դուռը՝ մի անգամ օրապահը ծխախոտ է ուզել, ասել են՝ չկա, մյուս անգամ թակել ու զգուշացրել են, որ զորամասի հերթապահը կարող է գալ ստուգման: Հացկերույթի գնալիս, այնտեղ գտնված ընթացքում, այնտեղից երկրորդ հարկ՝ իր ննջարանը իջնելիս վկան Հայկազ Բարսեղյանին, Գնել Թևոսյանին, Նորիկ Սահակյանին չի տեսել: Ըստ վկայի նախաքննական ցուցմունքի՝ հացկերույթի ժամանակ Մովսես Ազարյանի մոտի սպիտակ հեռախոսով լուսանկարվել են: Այդ լուսանկարները առկա են քրեական գործում: Հացկերույթի ընթացքում, ըստ վկայի, մասնակիցներից ոչ մեկը ագրեսիվ տրամադրված չի եղել, Հայկազ Բարսեղյանի մասին չեն խոսել: Առավոտյան վերկացից հետո վկան լսել է, որ երրորդ հարկում ինչ-որ մեկի «տեղերը սաղ արուն ա»: «Մեր վաշտն էլ են իջացրել, որ ման գանք, դեռ չգիտեինք՝ ինչ ա էղել, սպորտհրապարակից ձայներ ենք լսել, վազել ենք էնտեղ...»: Վկան Հայկազ Բարսեղյանի մասին ասաց. «Լավ սովորող , շնորհքով տղա էր, բայց ես նրա հետ չեմ շփվել...»: Նախաքննական ցուցմունքում վկան հայտնել էր, թե դեպքի հաջորդ օրը լսել է, որ դեպքից առաջ վեճ է եղել Վաչե Սահակյանի ու Հայկազ Բարսեղյանի միջև: Վկա, երրորդ կուրսի կուրսանտ Ասատուր Շահնազարյանն ասաց, թե ամբաստանյալներից մոտիկից ճանաչել է Վարազդատ Սաֆարյանին, Նորիկ Սահակյանը սովորել է իր զուգահեռ դասարանում, մյուսների հետ առանձնապես չի շփվել, նրանք իր դասակից չէին: Դեպքի օրը՝ երեկոյան ժամը 18-ն անց 30-ից վկա Շահնազարյանը վերակարգում է եղել՝ երկրորդ հարկում հերթապահել է: Վկան անմիջապես ասաց, թե կեսգիշերից հետո իր պարտականությունները թերություններով է կատարել, անընդհատ քնել է ու լավ չի տեսել, թե ինչ շարժ է տեղի ունեցել գիշերը: Նա տեսել է, թե իրենց հարկից մի քանի կուրսանտներ, այդ թվում՝ Վարազդատ Սաֆարյանը, ինչպես են «քուն» հրամանից հետո դուրս եկել ննջարանից ու բարձրացել երրորդ հարկ: Տեսել  է նաև նրանց վերադարձը՝ կեսգիշերից հետո: Բայց ավելի ուշ ինքը հիմնականում քնած է եղել: Իր իմանալով՝ այդ գիշեր քնել են նաև հարկի օրապահները: Վկան նշեց, թե առավոտյան է իմացել՝ ինչ է կատարվել: «Հայկազին անունով չգիտեի, միայն դեմքը գիտեի, նրա հետ շփում չեմ ունեցել... Առավոտյան աղմուկ էր բարձրացել, հասկացա, որ լուրջ բան ա էղել, Հայկազին էին որոնում... Մինչև ես իջա, որ ուղղություն ընտրեի՝ որ կողմ գնամ՝ ման գալու, սպորտհրապարակից գոռգոռոց լսեցի... Համարձակությունս չներեց, որ մոտենամ ու նայեմ, նման տեսարանների նայել չեմ կարողանում...»: Վկան ասաց, թե որոշ բաներ չի հիշում, քանի որ սովորություն ունի՝ «վատ մտքերը վանում է»: Բայց նախաքննության ընթացքում տվել է ճիշտ ցուցմունքներ, իրեն չեն ուղղորդել, չեն ճնշել: Ըստ նախաքննական ցուցմունքի՝ երբ հայտնաբերվել  է Հայկազի մարմինը ու իրենց՝ որպես օրվա հերթապահների հարցրել են՝ գիշերը մարդու չե՞ն տեսել, ինքն ասել է, թե մի հոգու տեսել է, նա օձիքը բարձրացրած իջել է ներքև: Այդ ժամանակ Վաչե Սահակյանն իրեն ու Արտուշ Սիմոնյանին ասել է. «Ի՞նչ եք տեսել, որ ասում եք՝ մարդ եք տեսել...»: Վկա Շահնազարյանը նախաքննական ցուցմունքում բացասական բնութագիր էր տվել Վարազդատ Սաֆարյանին՝ ասելով, որ Վարազդատը «իրեն լկտի ու սանձարձակ էր պահում... լարված մթնոլորտ էր առաջացնում դասակում, անհիմն հարվածներ էր հասցնում կուրսանտներին»: Վարազդատ Սաֆարյանը վկայի դասակի հրամանատարի տեղակալն է եղել, հրամանատարի բացակայության դեպքում նա է դիտողություններ արել կուրսանտներին, այդպես է առաջացել նրա կոնֆլիկտը Արտուշ Սիմոնյանի հետ, ում Վարազդատը դիտողություն  է արել գոռգոռալով: Մի ցուցմունքում վկան նշել էր, թե Վարազդատը մոտեցել ու հարվածել է Արտուշին: Դատարանում վկան ասաց, թե իրականում Վարազդատը լսարանում ոչ թե հարվածել, այլ հրել է Արտուշին... Հայկազի մարմինը հայտնաբերվելուց հետո, ըստ վկայի նախաքննական ցուցմունքի, Վարազդատ Սաֆարյանը « դողում էր, սրանից-նրանից ծխախոտ էր ուզում»: Վարազդատը փորձել է վկային համոզել, որ նախորդ գիշեր ինքն ավելի շուտ է իջել հացկերույթի վայրից ու անմիջապես գնացել է ննջարան և քնել է: Շահնազարյանը պնդել է, թե անձամբ է տեսել, որ Վարազդատը Դավիթի հետ վերջում է երրորդ հարկից իջել երկրորդ հարկ: Նա նույնիսկ ալկոհոլի հոտ է զգացել, հասկացել է, որ երրորդ հարկից իջնողները խմել են, ու նրանց ասել է. «Տղե՛րք, գնացեք քնելու»: Վկա Շահնազարյանն  ասաց. «Դեպքից հետո մենք բոլորս էլ մեղքի զգացում ունեինք, որ այդ գիշեր սահմանված կարգով չէինք տարել մեր հերթապահությունը... Ես դրանից հետո փորձել եմ վանել վատ մտքերը, ոչինչ չհիշել, որովհետև վատ մտքերի պատճառով չէի կարողանում կենտրոնանալ... Մենք գտնվում էին ծանր վիճակի՝ հոգեվարքի մեջ, դրա պատճառով կարող է և շատ բաներ դեպքից անմիջապես հետո գրած չլինեմ, այլ հիշած ու գրած լինեմ ավելի ուշ...»: Վկան նախաքննական ցուցմունքում հիշել ու գրել էր, որ օրապահ Արտուշ Սիմոնյանն իրեն ասել է, թե դեպքի գիշերը տեսել է չորս հոգու, ովքեր իջնում էին աստիճաններով... Հաջորդ նիստին դատարանը կշարունակի վկաների հարցաքննությունը, իսկ հաջորդ նիստը մարտի 20-ին տեղի կունենա, որովհետև մինչ այդ Գնել Թևոսյանի շահերի պաշտպան, փաստաբան Արա Զաքարյանը Ստրասբուրգի Մարդու իրավունքների դատարանում մասնակցելու է դասընթացների: