Այսօր ԵԽԽՎ-ում «Լրագրողների նկատմամբ հարձակումներն ու մամուլի ազատությունը Եվրոպայում» զեկույցի քննարկման ժամանակ ելույթով է հանդես եկել նաև ՀՀ պատվիրակության անդամ Նաիրա Զոհրաբյանը։ Ներկայացնում ենք ելույթն ամբողջությամբ։ «Հարգելի գործընկերներ, Անկեղծ ասած, երբ սկսեցի ծանոթանալ Վլադիմիր Արիևի զեկույցին, որը շատ ակտուալ թեմա է բարձրացնում՝ լրագրողների և ԶԼՄ-ների  ազատության դեմ հարձակումները Եվրոպայում, հույս ունեի, որ գործ ենք ունենալու անաչառ գնահատականների հետ։ Որպես նախկին լրագրող, ինձ համար իրապես շատ կարևոր խնդիր է լրագրողների դեմ բռնությունը, որի մասին անպայմանորեն պետք է բարձրաձայնվի մեր կառույցում։ Հույս ունեի, որ պարոն Արիևն իր զեկույցում կանդրադառնար, օրինակ, Ուկրաինայում քաղաքական նպատակներով փակված «Դոժդ» հեռուստաընկերությանը,  ինչպես նաև` «Մասսայական տեղեկատվության ինստիտուտի» ներկայացրած փաստերին, համաձայն որի՝  միայն անցյալ տարվա ութ ամիսներին Ուկրաինայում արձանագրվել է լրագրողների պրոֆեսիոնալ գործունեությանը խոչընդոտելու 224 դեպք, որ իշխանությունները և իշխանության հովանավորյալ առանձին դեմքեր սպառնում են լրագրողներին, և որ Ուկրաինայում իրավապահները զգուշանում են հարուցել քրեական գործեր կոնկրետ այդ դեպքերով։ Անկեղծորեն ակնկալում էի, որ «սառեցված հակամարտությունների լուրջ գիտակ» Արիևը չէր շրջանցի անցյալ տարվա հուլիսին Կիևի կենտրոնում  ուկրաինացի հայտնի լրագրող Պավել Շերեմետի սպանությունը, որը, ինչպես վստահեցնում է  քաղաքագետ Ալեքսեյ Գարանը՝ ուղղակի կապ ունի ուկրաինական կոռումպացված չինովնիկների հետ, որոնց համար Շերեմետը  մահացու վտանգ էր։ Այս և նման լրջագույն խնդիրներին անդրադառնալու փոխարեն, պարոն Արիևը իրեն իրավունք է վերապահել քիթը մտցնել Լեռնային Ղարաբաղի հակամարտության խնդրի մեջ, թույլ տալով անընդունելի ձևակերպումներ և եզրահանգումներ։ Իմ տպավորությամբ, զեկույցի հեղինակը Եվրոպայում մամուլի ազատության թեման օգտագործել է որպես պատրվակ՝ իր զեկույցում Լեռնային Ղարաբաղը Ադրբեջանի մաս, իսկ Արցախի իշխանությանը՝ անջատողականներ որակելու համար։ Պարոն Արիև, ակնհայտորեն ձեզ հանգիստ չեն տալիս Լուկա Վոլոնտեի, Բոբ Վոլթերի, Մելիսա Մարկովիչի և ԵԽԽՎ մի շարք այլ պատգամավորների դափնիներն ու դուք գլխապատառ շտապում եք գրավել նրանց տեղը։ Խորհուրդ չէի տա, որովհետև նրանց ու Ադրբեջանի  մնացյալ լոբբիստներին լավ օրեր չեն սպասվում։ Ի դեպ, ինչ վերաբերում է խոսքի ազատությանը,  ապա, իմ կարծիքով, ամենաքիչը դուք իրավունք ունեք խոսելու խոսքի ազատությունից, դուք, որ դեկտեմբերի 22-ին Ուկրաինայի Ռադայում ձեր ելույթով ամեն ինչ արեցիք, որպեսզի Ռադան կողմ քվեարկի մեր գործընկեր Նադեժդա Սավչենկոյին ԵԽԽՎ-ից հեռացնելու օգտին։ Սավչենկոյին դուք և ձեր գործընկերները հեռացրեցին նաև «Բատկիվշինա» կուսակցությունից և Ռադայի Ազգային անվտանգության ու պաշտպանության հանձնաժողովից։ Ընդ որում, դուք դա արեցիք միաձայն, առանց անգամ մեկ դեմ ձայնի։ Իրապես, խոսքի և մտքի ինչպիսի՞ ազատություն։ և ինչի՞ համար։ Ընդամենն այն բանի համար, որ Սավչենկոն Մինսկում հանդիպել էր Լուգանսկի և Դոնեցկի լիդերների հետ՝ քննարկելու ռազմագերիների փոխանակման հարցերը։ Այնպես որ, դուք իրավունք չունեք խոսելու ո՛չ խոսքի ազատությունից և ո՛չ էլ մարդու իրավունքներից, և առավել ևս՝ Լեռնային Ղարաբաղի խնդրից, որի լուծումը, բարեբախտաբար, ձեր ու ձեր նմանների իրավասությունը չէ»։