Թուրքիայում սահմանադրական փոփոխությունների շուրջ հանրաքվեում դրական արդյունք լինելու պարագայում երկրում խորհրդարանական կառավարման համակարգը կպահպանվի մինչև 2019 թվական: Այս մասին Anadolu գործակալությանը տված հարցազրույցում հայտնել է Թուրքիայի փոխվարչապետ Նու ման Քուրթուլմուշը: «Սահմանադրական առաջարկով նախատեսվում է, որ անցումը նախագահական համակարգին տեղի կունենա 2019-ի նախագահական ընտրություններով: Եթե հանրաքվեի արդյունքները դրական լինեն, խորհրդարանական համակարգը կպահպանվի մինչև 2019 թվականի ընտրությունները: 2019-ին նույն օրը կհրավիրվեն թե՛ խորհրդարանի, թե՛ նախագահի ընտրություններ»;-ասել է փոխվարչապետը: Թուրքիայի մեջլիսը հավանություն է տվել իշխող «Արդարություն և զարգացում» կուսակցության կողմից առաջարկված սահմանադրական փոփոխություններին, որոնք բաղկացած են 18 կետից: Դրանց հավանություն է տվել նաև ընդդիմադիր «Ազգայնական շարժում» կուսակցությունը: