«Առաջին լրատվական»- ի զրուցակիցն է «Քաղաքացիական պայմանագիր» կուսակցության վարչության նախագահ Սասուն Միքայելյանը: - Պարոն Միքայելյան, թեպետ դեկտեմբերի 12-ին հանդես եք գալու հայտարարությամբ՝ «Հանրապետություն» և «Լուսավոր Հայաստան» կուսակցությունների հետ, այնուամենայնիվ, քաղաքական դաշտում նախկինում Ձեր ծավալած գործունեությունից ելնելով, ինչ եք կարծում, այս անգամ դաշինքով հանդես գալը Ձեզ հաջողություն կբերի՞ 2017թ խորհրդարանական ընտրություններում: - Ես քննադատողներից մեկն եմ եղել, որ դաշինքները կազմավորվել, համախմբվել են հենց նախընտրական շեմին, ու դա արդյունք չի տվել: Այս դաշինքը նման կարգով չի ձևավորվելու: Դեկտեմբերի 12-ին կուսակցությունները համատեղ միասնության հուշագիր կստորագրեն, այդ ժամանակ պարզ կլինի, թե ինչ է գրված հուշագրում: Դրանից հետո մենք՝ երեք կուսակցություններով համաժողով կանցկացնենք և մեր ծրագրերով հանդես կգանք: Մենք ուզում ենք դառնալ մեկ քաղաքական միավոր: Կուսակցությունները պետք է կարողանան համախմբվել, որ կարողանան ծրագրեր իրականացնել, թե չէ այսպես ցաքուցրիվ կերպով չի լինի: Որոշ կուսակցություններ էլ նոր են ձևավովել իշխանական թևում, ընտրություններին գիտե՞ք ինչ է կատարվում։ Այս դաշինքը երբևիցե չի նմանվի նախորդ դաշինքներին: Ես մեր համաժողովի ժամանակ էլ նշեցի, որ միայն լուսահոգի Վազգեն Սարգսյանի և Կարեն Դեմիրճյանի «Միասնություն» դաշինքն էր, որ կարողացավ հաջողության հասնել, բայց, ցավոք սրտի, շատ դաժան վախճան ունեցավ: Եվ այսօր շատ բան չեմ խոսի, դեկտեմբերի 12-ին կներկայացնենք, թե ինչ հարցերի շուրջ ենք ուզում համախմբվել: - Կարո՞ղ ենք ասել, որ սա միայն նախընտրական համագործակցություն չէ, այսինքն՝ ընտրություններից հետո, խորհրդարանում որոշակի տեղեր ունենալուց կամ մեծամասնություն կազմելուց հետո այս ձևաչափով կշարունակեք համագործակցությունը: - Անկասկած, հենց հիմքը դա է: Ինչի՞ համար եմ ես քննադատում նախորդ դաշինքներին. նրա համար, որ նրանք ոչ մի առանցքային հարցի շուրջ համաձայնության չեն եկել, համախմբումը չի ստացվել, մեղավորներ են փնտրել, մեղքը գցել են իրար վրա, գաղափարական միասնություն չի եղել դաշինքների միջև: Մենք ուրիշ ձևաչափով ենք ուզում հանդես գալ: Ժողովրդին պիտի տեսանելի լինի, թե հետագայում այս ստեղծվող դաշինքն ինչ է ուզում անել, քաղաքական ինչ գործունեություն է ուզում ծավալել բոլոր բնագավառներում: Մենք ուզում ենք ժողովրդին այս արհավիրքից ազատենք: ՀՀԿ-ն այսօր արհեստական արհավիրք է մեր ժողովրդի համար: - Կարծում եք այդ երեք կուսակցությունների միջև կա՞ գաղափարական համաձայնություն: - Քննարկումներ եղել են տարբեր կուսակցությունների, անհատների, ՀԿ-ների հետ, առանցքային հարցերի շուրջ մեծամասամբ համաձայնության ենք եկել: - ՀՀԿ վերջին համագումարին հետևելով՝ ի՞նչ եք կարծում, ՀՀԿ-ն այդպես հեշտությամբ կզիջի՞ իր դիրքերը: Քաղաքացիների հետ ինչպե՞ս եք աշխատանք տանելու: - Ի՞նչ է ուզում հանրապետականը: Այսօր ծայրահեղ վիճակ է Հայաստանում, բոլոր բնագավառներում՝ սոցիալական, ռազմական, տնտեսական։ Միշտ այդ հարցը տալիս են՝ կարո՞ղ եք-չե՞ք կարող, ի՞նչ կլինի… Իսկ ի՞նչ անենք, նստենք սպասենք, մինչև ՀՀԿ-ն մինչև վերջ քանդի՞ այս երկիրը, մի օր էլ թշնամին կհարձակվի, ամեն ինչ կվերջանա՞, դրա՞ն ենք սպասում: Մենք այդպես չենք մտածում: Իմ անցած ճանապարհին, դուք տեղյակ եք, ես միշտ պայքարի մեջ եմ եղել և երբեք չեմ հուսահատվել: Սրանց վերջը պիտի գա մի օր: Չի կարող այսպես մնալ, Հայաստանը մի մարդու սեփականությունը չէ, որ ոնց ուզի՝ գործունեությունը ծավալի, ում ուզի՝ գործից ազատի, ում ուզի՝ բերի գործի: Ոնց ուզեն, ում ուզեն կարող են կալանավորել, անօրեն երկիր է: Սրան վերջ պիտի դրվի, եթե վերջ չդրվի՝ ազգովի գնում ենք դեպի կործանում: Մենք չմտածե՞նք էս երկիրը փրկելու մասին. հլը սրանցից՝ հանրապետականներից փրկենք, որ փրկվենք: Թե չէ անիմաստ է էս ամեն ինչը: Մենք անկախացել ենք, վերջիվերջո յոթ հազար - ութ հազար մարդ է իր գլուխը դրել անկախության զոհասեղանին: Մենք Եռաբլուր ունենք, մենք Եռագույն ունենք, զինանշան ունենք, բայց էսօր նայում ես ՀՀԿ-ի գործունեությանը և նրա ապագա գործունեությանը՝ տանում է դեպի Կոմունիստական կուսակցություն: Մենք պայքարել ենք, անկախ պետություն, ազատ անկախ Հայաստան ունենալը մեր երազանքն է եղել: Պատերազմ հաղթանակած ժողովրդին վայե՞լ է նման ապրելակերպը: Այս սերունդը բեկում մտցրեց, հողեր ազատագրեց, ընդլայնեց մեր երկրի սահմանները, բայց այս իրավիճակում մարդիկ արհամարհված են, չգիտեն ինչ անեն, այսինքն՝ եթե հանրապետական ես՝ կարող ես մի տեղ աշխատել, ծանոթով ինչ-որ հարց լուծել, եթե չէ, ուրեմն դու հայ չես, դու էս հողի վրա չես մեծացել: Շերտավորումներ կան՝ օտարներ, յուրայիններ, այսպես չի կարելի: Բոլորիս պարտականությունն է, գիտակից ամեն մի հայ իր բաժին բեռը պետք է վերցնի, որ այս վիճակից դուրս գանք: - Փոփոխության հասնելն ընտրությունների միջոցով կարծում եք այսօր օրակարգայի՞ն է՝ հաշվի առնելով առկա անվստահությունը: - Ոչ, օրակարգային չէ, բայց ժողովուրդն էլ պիտի այսօր գիտակցի։ Այս երեք կուսակցությունները միասնություն են կազմելու, այլ քաղաքական ուժեր էլ կարող են միանալ, բայց կոնսենսուսով է լինելու, այսինքն՝ երեք ուժերի համաձայնության դեպքում: Այս կարգավիճակով, այս ֆինանսական ռեսուրսներով հնարավոր չէ ընտրությունների միջոցով իշխանափոխության հասնել, բայց դա չի նշանաում, որ իրավիճակ չի կարող զարգանալ: Տեսաք՝ ինչ կատարվեց 2008-ին․ ժողովուրդը երկու պահանջ ունի՝ իշխանափոխություն, և իշխանափոխության հասնելու ժողովրդի հույսը դաշինքներն են, ժողովուրդը պահանջում է, որ ավելի ընդլայնված դաշինքներ ձևավորվեն: Բայց ընդլայնված դաշինքների ձևավորման դեպքում իշխանության ձեռքն ինչ-որ տեղ հասանելի է լինում՝ պատրաստ քանդելու: Կա պահանջ իշխանափոխության, կա պահանջ դաշինքի, և դաշինքով կարող ես գնալ իշխանափոխության: Այդ ընթացքում պիտի իրավիճակ զարգանա: Բոլորը բողոքում են կյանքից, այս վիճակից արտագաղթից․ ժողովուրդն էլ պիտի գիտակցի, թե ում է ձայն տալիս: Ժողովո՛ւրդ ջան, Ձեր ձայնը մի՛ վաճառեք: Ժողովրդին պիտի տանես մինչև վերջ, կյանքի գնով էլ լինի կանգնես ժողովրդի կողքին, ժողովրդի հետ մինչև վերջ գնաս: Իշխանափոխությունն այդքան դժվար բան չէ. ասում են՝ սատանան էդքան վախենալու չի, ինչքան սատանայի մասին խոսում են: Չենք ասում՝ զենք-զրահ վերցնենք, գնանք կոտորենք էս իշխանությանը, բայց եթե ժողովուրդն իր ձայնով օգնի մեզ, որոշակի մանդատ տա՝ 30 տոկոս, 40 տոկոս, իսկ եթե 50 տոկոս լինի՝ մենք կտանենք իշխանափոխության:   Հարցազրույցն ամբողջությամբ՝ տեսանյութում: