Հնդկաստանի Ասամ նահանգում հորդառատ անձրևների հետևանքով առաջացած ջրհեղեղներից տուժել է ավելի քան 170 հազար մարդ։   NDTV-ն հայտնում է, որ ջրհեղեղներից տուժել է 12 շրջան, 30 վարչական գոտի և 580 գյուղ։ Առավել ծանր իրավիճակ է ստեղծվել Սիվասագար, Չարաիդեո և Ջորհաթ շրջաններում, որտեղ ջրի տակ են անցել բնակավայրեր, վնասվել են ամբարտակներ և երկաթուղային գծեր։ Ավելի քան 10 հազար հեկտար գյուղատնտեսական մշակաբույսեր հեղեղվել են։ Գուվահաթի քաղաքում ջուրը լցվել է տները, վնասել կահույքն ու կենցաղային տեխնիկան։ Մի շարք ընտանիքներ չեն կարողացել սնունդ պատրաստել, քանի որ խոհանոցները հայտնվել են ջրի տակ։ Ջրի բարձր մակարդակի պատճառով խաթարվել է գնացքների երթևեկությունը։ Մի շարք երթուղիներ չեղարկվել, կրճատվել կամ փոխվել են։ Փրկարարական աշխատանքներին ներգրավվել են հնդկական բանակը, Ասամի հրաձիգները և Աղետների արձագանքման ազգային ուժերը։ Ջրհեղեղից կտրված բնակիչներին տարհանելու համար գործարկվել են տասնյակ նավակներ։